Fana: At a Speed of Life!

በ2012 በመስኖ ዘርፍ ለ12 ሺህ ወጣቶች የስራ እድል ለመፍጠር እየተሰራ ነው

አዲስ አበባ፣ ነሃሴ 17፣ 2011 (ኤፍ .ቢ.ሲ) የውሀ መስኖ እና ኢነርጅ ሚኒስትር ዶክተር ኢንጅነር ስለሽ በቀለ የከፍተኛ ትምህርታቸውን ላጠናቀቁ 12 ሺህ ወጣቶች በ2012 በመስኖ ዘርፍ የስራ እድል እንደሚፈጠርላቸው ተናገሩ፡፡

ሚኒስትሩ ከፋና ብሮድካስቲንግ ኮርፖሬት ጋር ባደረጉት ቆይታ በሶስት ክልሎች አሁን ላይ ወጣቶችን የማሰልጠን ስራዎች እየተካናወነ መሆኑን ገልጸዋል፡፡

ለዚህም 15 ያህል የመስኖ ፕሮጀክቶች የተለዩ ሲሆን÷ በ2012 ዓመተ ምህረት 50 ሺህ ሄክታር መሬት በወጣቶቹ በመስኖ ለማልማት ተለይቷል ብለዋል።

ከዚህም መካከል እስካሁን 38 ሺህ ሄክታር መሬት መዘጋጀቱን ነው የሚናገሩት፡፡

መሬቱ ዝግጁ ከሆነባቸው 15 የመስኖ ፕሮጀክቶች ውስጥ በኦሮሚያ ክልል የሚገኘው አርጆ ደዴሳ 10 ሺህ ሄክታር፣ ደቡብ ክልል ጊዳቦ 3 ሺህ ሄክታር፣ አፋር ክልል ተንዳሆ 6 ሺህ ሄክታር፣ ጋምቤላ ክልል አልዌሮ 5 ሺህ ሄክታር መሬት ተጠቃሾች ናቸው።

ከዚሁ ጎን ለጎን ወጣቶችን የመለየት ስራዎች እየተሰራ ሲሆን ÷በኦሮሚያ፣ በሶማሌ እና አፋር ክልሎች ለወጣቶች ስልጠና ተሰጥቷል ብለዋል።

ወጣቶቹ በተለይም ከተማሩት የትምህርት አይነት ጋር ግንኙነት ባለው የትምህርት መስኮች የሰለጠኑ ወጣቶች የስራ እድሉ ተጠቃሚ እንደሚሆኑም ነው የተናገሩት፡፡

ተቋሙ የስልጠና ድጋፎችን በራሱ ወጪ እያደረገ ቢሆንም ወጣቶቹ ለስራ የሚያስፈልጋቸውን ወጪ ሰርተው በሚመልሱበት መንገድ እንዲያገኙ ይደረጋልም ነው ያሉት።

ለስልጠና እና ሌሎች መሰረተ ልማቶችም ሚኒስቴሩ 1 ቢሊየን ብር የሚጠጋ በጀት መመደቡን ጠቅሰዋል።

ከዚህም ሌላ ወጣቶች ወደ ስራ ሲገቡ የሚጠቀሙት 5 ቢሊየን ብር ተዘዋዋሪ ፈንድ እንደሚያስፈልግም መረጃዎች ያመላክታሉ ።

በዙፋን ካሳሁን

You might also like
Comments
Loading...