Fana: At a Speed of Life!

በ2011 በጀት ዓመት በማዕድን ዘርፍ 4 ነጥብ 95 ቢሊየን ብር ኢንቨስትመንት መመዝገቡ ተገለፀ

አዲስ አበባ፣ ነሃሴ 6፣ 2011 (ኤፍ.ቢ.ሲ) በ2011 በጀት ዓመት በማዕድን ዘርፍ 4 ነጥብ 95 ቢሊየን ብር ኢንቨስትመንት መመዝገቡን የማእድን እና ነዳጅ ሚኒስቴር አስታወቀ።

የኢፌዴሪ ማዕድንና የነዳጅ ሚኒስቴር ባወጣው መግለጫው ነው ይህንን ያስታወቀው።

በበጀት ዓመቱ 5 የምርት እና 19 የምርመራ ፈቃዶች የተመዘገቡን ያስታወቀው ሚኒስቴሩ፥ የኢንቨስትመንት መጠኑም 4 ነጥብ 95 ቢሊየን ብር መድረሱን ነው የሚያመላክተው።

የወርቅ፣ የዕብነ በረድ፣ ብረት፣ የከበሩ የጌጣጌጥና ሌሎች ማዕድናት ፍለጋና ልማት ሥራ ላይ የዋለው ኢንቨስትመንት ካፒታል ብር 1 ነጥብ 124 ቢሊየን ሲሆን፥ በነባር 11 የነዳጅ ፍለጋና ልማት ሥራ ስምምነቶች፣ የተፈጥሮ ጋዝ ፍለጋ ለማካሄድ ከ1 ነጥብ 96 ቢሊዮን ብር በላይ ኢንቨስት ተደርጓል፡፡

በኦጋዴን የተገኘውን 6 ነጥብ 3 ትሪሊየን ኪዩቢክ ጫማ የተፈጥሮ ጋዝ ክምችት ለማልማት ማስተላለፊያ ቧንቧ ዝርጋታ ስምምነት መፈረምና ወደ ስራ መግባት የኢንቨስትመንት ፍሰቱን ያሳድገዋል ተብሎ እንደሚጠበቅም ነው ሚኒስቴሩ የተገለጸው።

በበጀት ዓመቱ በኩባንያዎችና በባህላዊ አምራቾች ለብሔራዊ ባንክና ለውጭ ገበያ ከቀረቡ የተለያዩ ማዕድናት 48 ነጥብ 938 ሚሊየን የአሜሪካ ዶላር ገቢ መመገኘቱም ተገልጿል።

የአካባቢና ማህበረሰብ አልሚዎች 34 ሚሊየን ብር ገቢ ማድረግ መቻላቸውም በመግለጫው ተካቷል።

በዘርፉ በኩባንያዎችና በባህላዊ ማዕድን አምራቾች ከ179 ሺህ በላይ ዜጎቻችን የስራ ዕድል መፈጠሩንም ሚኒስቴሩ አስታውቋል።

በበጀት ዓመቱ በተለያዩ የሀገሪቱ አካባቢዎች የነበሩ የፀጥታ ችግሮች ከዘርፉ መገኝት ያለበትን ውጤት እንዳይገኝ ተግዳሮት መሆናቸው ጠቁሟል፡፡

በ2012 በጀት አመት ከማዕድናት የወጪ ንግድ 265 ነጥብ 5 ሚሊየን ዶላር ለማግኘት ታቅዷል።

እቅዱን ለማሳካት የተለያዩ የሪፎርም ስራዎች እንደሚከናወኑ ተመላክቷል።

በተለይም የኮንትሮባንድ ንግዱን ለመከላከል ሰፊ የንቅናቄ ስራ ይካሄዳል ነው የተባለው።

በ2011 በጀት አመት 35 ነጥብ 9 ኪሎ ግራም ወርቅ ከሀገር ሊወጣ ሲል መያዙ የተገለጸ ሲሆን÷ በያዝነው በጀት አመትም የድንበሮች የቁጥጥር ስራው ተጠናክሮ ይቀጥላል ተብሏል፡፡

የተዘጉ የወርቅ ማምረቻዎች በተመለከተም በገለልተኛ ወገን የሚደረገው ጥናት ሲጠናቀቅ ይፋ እንደሚደረግ ነው የተገለጸው።

በፋሲካው ታደሰ

You might also like
Comments
Loading...