Fana: At a Speed of Life!

በ2011 በጀት ዓመት በማዕድኑ ዘርፍ 4 ነጥብ 95 ቢሊየን ብር ኢንቨስትመንት ተመዘገበ

አዲስ አበባ፣ ነሃሴ 6፣ 2011 (ኤፍ.ቢ.ሲ) በ2011 በጀት ዓመት በማዕድኑ ዘርፍ 4 ነጥብ 95 ቢሊየን ብር ኢንቨስትመንት መጠን መመዝገቡን የማእድን እና ነዳጅ ሚኒስቴር አስታወቀ፡፡

የኢፌዴሪ ማዕድንና የነዳጅ ሚኒስቴር በማህበራዊ ድረ ገጹ ይፋ ባደረገው መግለጫው እንዳስታወቀው በ2011 በጀት ዓመት 4 ነጥብ 95 ቢሊየን ብር የኢንቨስትመንት መጠን ተመዝግቧል፡፡

በበጀት ዓመቱ 5 የምርትና 19 የምርመራ ፈቃዶች የተመዘገቡ ሲሆን÷ የኢንቨስትመንት መጠኑም 4 ነጥብ 95 ቢሊየን ብር መድረሱን ነው መግለጫው የሚያመላክተው፡፡

የወርቅ፣ የዕብነ በረድ፣ ብረት፣ የከበሩ የጌጣጌጥና ሌሎች ማዕድናት ፍለጋና ልማት ሥራ ላይ የዋለው ኢንቨስትመንት ካፒታል ብር 1 ነጥብ 124 ቢሊየን ሲሆን÷ በነባር 11 የነዳጅ ፍለጋና ልማት ሥራ ስምምነቶች፣ የተፈጥሮ ጋዝ ፍለጋ ለማካሄድ ከ1 ነጥብ 96 ቢሊዮን ብር በላይ ፈሰስ ተደርጓል፡፡

በኦጋዴን የተገኘውን 6 ነጥብ 3 ትሪሊየን ኪዩቢክ ጫማ የተፈጥሮ ጋዝ ክምችት ለማልማት ማስተላለፊያ ቧንቧ ዝርጋታ ስምምነት መፈረምና ወደ ስራ መግባት የኢንቨስትመንት ፍሰቱን ያሳድገዋል ተብሎ እንደሚጠበቅም ነው የተገለጸው፡፡

በበጀት ዓመቱ በኩባንያዎችና በባህላዊ አምራቾች ለብሔራዊ ባንክና ለውጭ ገበያ ከቀረቡ የተለያዩ ማዕድናት 48 ነጥብ 938 ሚሊየን ዶላር መገኘቱም ተገልጿል፡፡

የአካባቢና ማህበረሰብ አልሚዎች 34 ሚሊየን ብር ገቢ ማድረግ መቻላቸውም በመግለጫው ተካቷል፡፡

በዘርፉ በኩባንያዎችና በባህላዊ ማዕድን አምራቾች ከ179 ሺህ በላይ ዜጎች የስራ ዕድል ተፈጥሯል፡፡

በበጀት ዓመቱ በተለያዩ የሀገሪቱ አካባቢዎች የነበሩ የጸጥታ ችግሮች ከዘርፉ መገኘት ያለበትን ውጤት እንዳይገኝ ተግዳሮት መሆናቸው ተጠቁሟል፡፡

You might also like
Comments
Loading...