Fana: At a Speed of Life!

በደቡብ ክልል የአደረጃጀት ጥናት ላይ በፌደራል ደረጃ ውይይት እየተካሄደ ነው

 

አዲስ አበባ፣ ነሃሴ 7፣ 2011 (ኤፍ.ቢ.ሲ) የደቡብ ክልል የአደረጃጀት ጥያቄዎች ዳሰሳዊ ጥናት ግኝትና ምክረ ሀሳብ ላይ የሚደረገው ውይይት ዛሬ በፌደራል ደረጃ በአዲስ አበባ በመካሄድ ላይ ይገኛል።
 
የውይይት መድረኩ በሀገራዊና ክልላዊ ሁኔታዎች ላይ እንዲሁም የደቡብ ክልል የአደረጃጀት ጥያቄዎች ዳሰሳዊ ጥናት ግኝትና ምክረ-ሀሳብ ላይ ምክክር እንደሚያደርግ ተገልጿል።
 
በውይይቱ ላይ በፌደራል ደረጃ በተለያዩ ከፍተኛ አመራርነት ላይ የሚገኙ የክልሉ ተወላጆች እንዲሁም ከክልል ውጪ የሚገኙ የክልሉ ተወላጆች ተገኝተዋል፡፡
 
በተያያዘ ዜና የአዲስ አበባ የደኢህዴን አመራሮች በደቡብ ክልል የአደረጃጀት ጥናት ላይ ውይይት እያካሄዱ ነው።
በአዳማ ከተማ እየተካሄደ ባለው መድረክ ላይም ከከተማ አስተዳደሩ ጀምሮ እስከ ወረዳ ድረስ ያሉ የድርጅቱ አመራሮች በመሳተፍ ላይ ይገኛሉ።
 
በመድረኩ መክፈቻ ላይ አስተያየት የሰጡት የደኢህዴንና የኢህአዴግ ስራ አስፈፃሚ ኮሚቴ አባል የሆኑት አቶ ተስፋዬ በልጅጌ፥ በመድረኩ የክልሉን እንዲሁም አገር አቀፍ የፀጥታና የፖለቲካ ሁኔታ ላይ ውይይት እንደሚደረግ አንስተዋል።
 
እንዲሁም በደቡብ ክልል የተነሱትን የአደረጃጀት ጥያቄዎች አስመልክቶ በቀረቡት አማራጮች ዙርያ ጥልቅ ውይይት እንደሚካሄድበት አስታውቀዋል።
 
አቶ ተስፋዬ አክለውም፥ ደኢህዴን የህዝቦችን ጥያቄ በግምት ሳይሆን በእውቀት ላይ ተመስርትን በጥናት እንመልስ ብሎ በ10ኛ ድርጅታዊ ጉባኤ ሲነሳ በሀገር ደረጃ አዲስ ልምድ ይዞ የመጣና አማራጭ ሃሳቦችን እያበረከተ ጭምር ነው ብለዋል።
 
በዚህ መድረክ ከ1 ሺህ 45 በላይ ከተማው አመራሮች በመሳተፍ ላይ የሚገኙ ሲሆን፥ ለሚቀጥሉት 3 ቀናት የሚቀጥል ይሆናል።
 
ደኢህዴን በክልሉ የተነሱ የአደረጃጀት ጥያቄዎችን አስመልክቶ በሳይንሳዊ መንገድ ጥናት አስጠንቶ በስራ አስፈፃሚ እና በማእከላዊ ኮሚቴ ደረጃ ሲወያይ መቆየቱ ይታወሳል።
 
በደቡብ ክልል የተነሳውን የክልልነት ጥያቄዎች መሰረት አድርጎ የተካሄደውን ሳይንሳዊ ጥናት በሁሉም ደረጃ ውይይት እንዲካሄድበት በደኢህዴን ስራ አስፈፃሚና ማእከላዊ ኮሚቴ በተቀመጠው አቅጣጫ መሰረት ነው ውይይቶቹ በመካሄድ ላይ የሚገኙት።
 
You might also like
Comments
Loading...