Fana: At a Speed of Life!

በደቡብ አፍሪካ ታስረው ከነበሩ ኢትዮጵያውያን የመኖሪያና የስራ ፍቃድ ያላቸው መለቀቃቸውን የኢትዮጵያ ኤምባሲ ገለፀ

አዲስ አበባ፣ ነሃሴ 7፣ 2011 (ኤፍ.ቢ.ሲ) በደቡብ አፍሪካ ታስረው ከነበሩ ኢትዮጵያውያን መካከል በሀገሪቱ ለመኖርም ሆነ ለመስራት የፍቃድ ወረቀት ያላቸው ዜጎች ተጠቃለው ከነበሩበት ፖሊስ ጣቢያ እንዲወጡ መደረጉን የኢትዮጵያ ኤምባሲ ገለፀ።

በደቡብ አፍሪካዋ የጆሃንስበርግ ከተማ የሚኖሩ የውጭ ሀገራት ዜጎች የሀገሪቱን የንግድ ስርዓት በተጻረረ ሁኔታ በተመሳሳይ ምርቶች ንግድ ላይ ተሰማርተዋል በሚሉ ክሶች መሰረት የደቡብ አፍሪካ የጸጥታ መዋቅር ባሳለፍነው ሳምንት ባካሄደው ዘመቻ በርካታ ንብረቶች መወረሳቸውና ኢትዮጵያውያንን ጨምሮ በርካታ የውጭ አገራት ዜጎች ለእስር ተዳርገው እንደነበር ይታወሳል።

ይህንን ተከትሎም ኤምባሲው ከተባበሩት የኢትዮጵያ ማህበረሰብ ማህበር አመራር አባላት እና ከንግድ ማህበረሰብ ጋር በመሆን በእስር ላይ ይገኙ የነበሩ ዜጎች ጉዳይ እንዲታይ ድጋፍና ክትትል ሲያደረግ መቆየቱን አስታውቋል።

በዚህም በሀገሪቱ የመኖሪያና የስራ ፍቃድ ያላቸው ኢትዮጵያውያን በሙሉ ከእስር እንዲፈቱ መደረጉን በደቡብ አፍሪካ የኢትዮጵያ ኤምባሲ ገልጿል።

የተቀሩት ጥቂት ኢትዮጵያውያን ጉዳይ ግን በፍርድ ቤት እንዲታይ መደረጉ የተገለጸ ሲሆን፥ በእነዚሁ ዜጎች ዙሪያ የተጀመረው ድጋፍና ክትትል የሚቀጥል መሆኑንም አስታውቋል።

የተባበሩት የኢትዮጵያ ማህበረሰብ ማህበር ከቢዝነስ ኮሚኒቲው ጋር በመተባባር የራሱን ጠበቃ ቀጥሮ የዜጎች ጉዳይ አፋጣኝ መፍትሄ እንዲያገኝ ያደረገው ከፍተኛ እንቅስቃሴ ለተመዘገበው ውጤት ትልቅ አስተዋጽኦ ማበርከቱንም ኤምባሲው ገልጿል።

ማህበሩ ቀጣይም ከአፍሪካ ዳያስፖራ ፎረም እና ኤ.ሲ.አር.ኤም ከተባለ ድርጅት ጋር በመቀናጀትና ሌሎች ወንድምና እህት አፍሪካውያንን በማስተባበር በትናንትናው እለት ሰላማዊ ሰልፍ በማድረግ በኦፐሬሽኑ የተፈጸመው በደል እንዲታወቅ አድርጓል።

ማህበሩ በእነዚህ እንቅስቃሴዎች የተገኙ ውጤቶችን መነሻ በማድረግ ሰላማዊ ትግሉን አጠናክሮ እንደሚቀጥልና የቢዝነስ ኮሚኒቲውንና መላ ህብረተሰባችንን በማስተባበር በኦፐሬሽኑ ያለአግባብ የተወረሱ የዜጎቻችንን ንብረቶች ለማስመለስና የጉዳት ካሳ ለማስገኘት የሚንቀሳቀስ እንደሆነ ለመገንዘብ ተችሏል፡፡

ኤምባሲውም ለዚሁ አስፈላጊውን ድጋፍ እንደሚያደርግ ነው በዛሬው እለት ባወጣው መረጃ ያስታወቀው።

ኤምባሲው በቀጣይም ከመንግስትና ከዲፕሎማቲክ ማህበረሰብ ጋር በመሆን የዜጎች ችግሮች በአሳታፊነት እንዲፈቱ፣ ዘላቂ የጋራ ምክክር አሰራር እንዲዘረጋ የኢትዮጵያውያን ማህበረሰብ ማህበር እና የቢዝነስ ማህበረሰቡ የጀመሩትን የማስተባበር ስራ እንደሚደግፍም ገልጿል።

You might also like
Comments
Loading...