Fana: At a Speed of Life!

በወፍራም ሴቶች ላይ ተገቢ ያልሆነ አስተያየት የሰጠችው ጋዜጠኛ ከስራዋ ታግዳለች

አዲስ አበባ፣ ነሃሴ 24፣ 2011 (ኤፍ ቢ ሲ) በግብፅ የቴሌቪዥን ፕሮግራም አቅራቢዋ በወፍራም ሴቶች ላይ የሰጠችው አስተያየት የሀገሪቱን ሰዎች ማስቆጣቱ ተነግሯል

ሬሃም ሳዒድ የተባለቸው ጋዜጠኛ በምታስተላልፈው ፕሮግራም ላይ ከመጠን በላይ የወፈሩ ሰዎች ለቤተሰቦቻቸውም ሆነ ለሀገር የማይጠቅሙ ናቸው ስትል ተሳልቃለች።

ከዚህ ባለፈም ከመጠን በላይ ውፍረትና ክብደት ያላቸው ሴቶች ከተወሰነ ጊዜ ቆይታ በኋላ ሴትነታቸውን የሚያጡ በመሆኑ ደስተኛ ህይወት የመኖር ዕድል የላቸውም ብላለች።

በተጨማሪም ወፍራም ሴቶች የተቃራኒ ጾታን ስሜት የማይማርኩ በመሆኑ የትዳር አጋር የማግኘት ዕድላቸው ጠባብ ነው፤ ትዳር ቢይዙም እንኳን ፍቺ የመፈጸም ዕድላቸው ከፍተኛ ነው ብላለች።

አስተያየቷን ተከትሎም የሀገሪቱ ሴቶች በተለይም በማህበራዊ ትስስር ገጾች ላይ ከፍተኛ ትችትና ተቃውሞ አሰምተዋል።

ሬሃም የቀረበባትን ትችት አስመልክታ በማህበራዊ ትስስር ገጾች ላይ በሰጠችው አስተያየት ከመጠን በላይ ውፍረት የሚያስከትለውን ማህበራዊ ቀውስ በተመለከተ ያስተላለፈችው መልዕክት ለምን ሰዎችን እንዳስቆጣ ግራ በመጋባት ጠይቃለች።

በሰጠችው አስተያየት ምክንያት በሀገሪቱ የብሮድካስት ባለስልጣን ከስራዋ የታገደችው ሬሃም፥ እርምጃው በእኔ ላይ ምንም ተፅዕኖ አይፈጥርም፤ ጡረታ ወጥቼ ልጆቼን የምንከባከብበት ጊዜ መሆኑን አስገንዝቦኛልም ብላለች።

ምንጭ ፦www.egypttoday.com

You might also like
Comments
Loading...