Fana: At a Speed of Life!

በኢቦላ ተጠቂዎች ላይ የተሞከረው መድሃኒት 90 በመቶ የማዳን አቅም አለው ተባለ

አዲስ አበባ ፣ ነሃሴ 7 ፣ 2011 (ኤፍ ቢ ሲ) ኢቦላን ለመከላከል የተሞከረው መድሃኒት 90 በመቶ የማዳን እድል እንዳለው ተመራማሪዎች ገለጹ።

በበሽታው ላይ ምርመራ ሲያደርግ የቆየው የተመራማሪዎች ቡድን ያገኘውን የሙከራ ውጤት ይፋ አድርጓል።

ቡድኑ ካለፈው ህዳር ወር ጀምሮ አራት አይነት የተለያዩ መድሃኒቶችን በቫይረሱ ተጠቂዎች ላይ በዴሞክራቲክ ሪፐብሊክ ኮንጎ ሲሞክር ቆይቷል።

በሙከራው መሰረት ለቫይረሱ ተጠቂዎች የተሰጠው መድሃኒት 90 በመቶ የማዳን አቅም እንዳለው ተመራማሪዎቹ ይፋ አድርገዋል።

እንደ ተመራማሪዎቹ ገለጻ በቫይረሱ የተያዙ ሰዎች ምልክቱ በታየበት ወቅት በፍጥነት መድሃኒቱን ማግኘት ከቻሉ 90 በመቶ ይድናሉ።

አር ኢ ጂ ኤን – ኢቢ3 እና ኤም ኤቢ114 የተሰኙት መድሃኒቶች፥ ቫይረሱን ከሰውነት ህዋስ የማስወገድ አቅም አላቸው ተብሏል።

ከሁለቱ መድሃኒቶች በተጨማሪም ዜድማፕ እና ሬምዴሲቪር የተሰኙት መድሃኒቶችም የተሞከሩ ሲሆን፥ መድሃኒቶቹ በሽታውን አነስ ባለ መጠን የመከላከል አቅም አላቸው ነው የተባለው።

መድሃኒቶቹ በሽታው ዋነኛ ስጋት በሆነበት ዴሞክራቲክ ሪፐብሊክ ኮንጎ በ700 ሰዎች ላይ የተሞከሩ ሲሆን፥ እስካሁን የ499ኙ ውጤት ይፋ ሆኗል።

ከዚህ ውስጥ አር ኢ ጂ ኤን-ኢቢ3ን ከወሰዱት መካከል 29 በመቶው እንዲሁም ኤም ኤ ቢ114 ከወሰዱት ደግሞ 34 በመቶዎቹ ለህልፈት ተዳርገዋል።

ከዚህ ባለፈ ግን መድሃኒቶቹን በጊዜ (ቫይረሱ በሰውነት በስፋት ሳይሰራጭ) ካገኙት መካከል በቅደም ተከተል፥ የመጀመሪያውን የወሰዱት 94 በመቶ እንዲሁም ሁለተኛውን መድሃኒት የወሰዱት ደግሞ 89 በመቶ መዳን መቻላቸው ተገልጿል።

ይህ የሚሆነው ግን የቫይረሱ ተጠቂዎች መድሃኒቱን በፍጥነት ማግኘት ከቻሉ ብቻ መሆኑንም ቡድኑ አጽንኦት ሰጥቷል።

የአሁኑ ውጤት ተመራማሪዎቹ ለኢቦላ ቫይረስ ፍቱን መድሃኒት ለማግኘት መቃረባቸውን ማሳያ ተደርጎም ተወስዷል።

ይህ መሆኑም የኢቦላ ቫይረስ በጣም በቅርቡ መታከምና መዳን የሚችል በሽታ ይሆናል ሲሉ ተስፋቸውን ገልጸዋል ተመራማሪዎቹ።

 

 

ምንጭ፦ ቢቢሲ

You might also like
Comments
Loading...