Fana: At a Speed of Life!

በአማራ ክልል በ2012 በጀት ዓመት ከ14 ቢሊየን ብር በላይ ለመሰብሰብ ታቅዷል

አዲስ አበባ፣ ነሃሴ 11፣ 2011 (ኤፍ.ቢ.ሲ) በአማራ ክልል በ2012 በጀት ዓመት 14 ነጥብ 1 ቢሊየን ብር ለመሰብሰብ መታቀዱን የክልሉ ገቢዎች ቢሮ ሃላፊ ወይዘሮ ብዙዓየሁ ቢያዝን አስታወቁ፡፡

በዚህም በበጀቱ ዓመቱ ከመደበኛ ገቢ 12 ነጥብ 1 ቢሊየን ብር እና ከከተማ አገልግሎት ገቢ 2 ቢሊየን ብር ለመሰብሰብ መታቀዱን ሃላፊዋ ለፋና ብሮድካስቲንግ ኮርፖሬት ተናግረዋል፡፡

ይህን እቅድ ለማሳካት ቢሮው የሀይል ቅጥር መፈፀሙን የተናገሩት ወይዘሮ ብዙዓየሁ ለስራው ማነቆ የነበሩ መመሪያዎችን ከፌዴራል መንግስት ጋር በመሆን መፍታት እንደተቻለ ገልፀዋል፡፡

እቅዱ አሁን ያለው ውጫዊና ውስጣዊ መልካም የማህበራዊ፣ ፓለቲካዊ እና ኢኮኖሚያዊ ጉዳዮች ግምት ውስጥ በማስገባት የተዘጋጀ ነው ተብሏል፡፡

እንዲሁም በክልሉ የኢንቨስትመንት ፍሰት እየጨመረ መምጣቱን ለእቅዱ መሳካት መልካም አጋጣሚ መሆኑን ሃላፊዋ ጠቁመዋል፡፡

በተጨማሪም የአመራሩና የማህበረሰቡ ቀና አስተሳሰብ፣ የመልማት ጥያቄ እና ልማትን ለማፋጠን ያለው የባለቤትነት ስሜት እቅዱን ለማሳከት ሌላኛው አቅም ነው ተብሏል፡፡

ቢሮው በ2011 በጀት ዓመት 12 ቢሊየን ብር ለመሰብሰብ አቅዶ 11 ነጥብ 2 ቢሊየን ብር መሰብሰብ እንደቻለም ተነግሯል፡፡

በናትናኤል ጥጋቡ

You might also like
Comments
Loading...