Fana: At a Speed of Life!

በሰመራ ከተማ ከ432 ሚሊየን ብር በላይ ወጪ የተደረገበት የጨው ፋብሪካ ተመረቀ

አዲስ አበባ፣ ነሃሴ 13፣ 2011 (ኤፍ.ቢ.ሲ) በሰመራ ከተማ የተገነባው ኤስ ቪ ኤስ የጨው ፋብሪካ ተመረቀ፡፡

በምረቃ ስነ ስርዓቱ ላይ የማዕድን እና ነዳጅ ሚኒስትሩ ዶክተር ሳሙኤል ኦርቃቶ፣ የአፋር ክልል ርእሰ መስተዳድር አቶ አወል አርባ እና የፋብሪካው መስራችና ባለድርሻ አቶ አበባው ደስታ ተገኝተዋል፡፡

ዛሬ የተመረቀው ኤስ ቪ ኤስ የጨው ፋብሪካ ደረጃውን የጠበቀ ምርት እንደሚያመርት የማዕድን እና ነዳጅ ሚኒስትሩ ዶክተር ሳሙኤል ኦርቃቶ ተናግረዋል፡፡

የአፋር ክልል ርእሰ መስተዳድር አቶ አወል አርባ በበኩላቸው በተፈጥሮ ማዕድናት በበለጸገው የአፋር ክልል መሰል ፋብሪካዎች መስፋፋት እንዳለበት ነው የተናገሩት፡፡

በኢትዮጵያ እና በቱርክ ባለሃብቶች በጋራ የተገነባው ይህ ፋብሪካ 66 ነጥብ 6 በመቶ የግንባታ ወጪው በኢትዮጵውያን ባለሃብቶች የተሸፈነ ሲሆን÷ ቀሪው 33 ነጥብ 4 በመቶ ደግሞ በቱርክ ባለሃብቶች የተሸፈነ ነው፡፡

ለግንባታው በአጠቃላይ ከ432 ሚሊየን ብር በላይ ወጪ እንደተደረገበትም ተገልጿል፡፡

ፋብሪካው በወር ከ450 ሺህ ኩንታል በላይ የጨው ምርትን በመልቀም እና አራት ጊዜ ያህል በማጠብ 97 በመቶ የማድረቅ አቅም አለው፡፡

ለ700 የክልሉ ነዋሪዎች ቋሚ እና ለ200 ዜጎች ደግሞ ጊዜያዊ የስራ እድል ፈጥሯል፡፡

አሁን ላይም አዮዲን በመጨመር እና ሙቀትንና ቅዝቃዜን የሚቋቋም ማሸጊያን ጠርዞ በ50 ኪሎ ግራም መጠን ለአከፋፋዮች እያቀረበ ይገኛል፡፡

ፋብሪካው በክልሉ በግል ባለሃብቶች የተገነባ የመጀመሪያው ፋብሪካ ነው፡፡

በተመሳሳይ መልኩ በወር 750 ሺህ ኩንታል ምርት የማምረት አቅም ያለው ፋብሪካ በአፍዴራ ከተማ በግንባታ ሂደት ላይ ይገኛል፡፡

በ918 ሚሊየን ብር የሚገነባው ይህ ፋብሪካ ለ1 ሺህ 400 የክልሉ ነዋሪዎች ቋሚና ጊዜያዊ የስራ እድል የሚፈጥር ሲሆን÷ ከ6 ወር በኋላ ስራ ይጀምራል ተብሎ ይጠበቃል፡፡

በተያያዘ ዜና ቀደም ሲል ለአፍዴራ ከተማ ተማሪዎች የአዳሪ ትምህርት ቤት ለመገንባት የመሰረተ ድንጋይ ያስቀመጡት አቶ አበባው ደስታ ትምህርት ቤቱ በ2013 ግንባታው ተጠናቆ ተማሪዎችን መቀበል እንደሚጀምር በስነ ስርዓቱ ላይ ተናግረዋል፡፡

በጸጋዬ ንጉስ

You might also like
Comments
Loading...