Fana: At a Speed of Life!

በሩሲያ የሮኬት ፍንዳታ በተከሰተበት አካባቢ ያለው የጨረር መጠን ከመደበኛው በ16 እጥፍ ብልጫ እንዳለው ተገለፀ

አዲስ አበባ፣ ነሃሴ 8፣ 2011 (ኤፍ.ቢ.ሲ) በሩሲያ ለአምስት ሰው ሞት ምክንያት የሆነው የሮኬት ፍንዳታ በአካባቢ ያለውን የጨረር መጠን ከመደበኛው በ16 እጥፍ ከፍ እንዳደረገው ተገለፀ።

የሩሲያ የኒውክሌር ኤጀንሲ በወደብ ከተማዋ ሴቬሮድቪንስክ የሮኬት ፍንዳታ ከተከሰተ በኋላ በአካባቢው ያለውን የጨረር መጠን ለክቷል።

180 ሺህ ህዝብ በሚኖርባት ሴቬሮድቪንስክ ከተማ በሚገኙ ስድስት የሙከራ ጣቢያዎች የጨረር መጠኑ እንደተለካ የተገለፀ ሲሆን፥ በዚህም የጨረር መጠኑ ከመደበኛው ከአራት እስከ 16 እጥፍ መሆኑ ተነግሯል።

መደበኛው የጨረር መጠን በሰዓት 0 ነጥብ 11 ማይክሮሲኤቨርት ሲሆን በአንድ ጣቢያ በሰዓት 1 ነጥብ 78 ማይክሮሲኤቨርት መሆኑ ተነግሯል።

ይህ መጠን አደጋኛ ከሚባለው ደረጃ በታች መሆኑ የተገለፀ ቢሆንም፥ በሰው ላይ አነስተኛ ችግር ሊፈጥር እንደሚችል የኒውክሌር ባለሙያዎች ገልፀዋል፡፡

ፍንዳታውን ተከትሎ የጨረር መጠኑ ከመደበኛው ከፍ ያለ እንደነበረ እና ከቆይታ በኋላ ግን ወደ መደበኛ ደረጃ እንደተመለሰ ሴቬሮድቪንስክ ከተማ ባለስልጣናት ጠቁመዋል።

ሆኖም የከተማዋ ባለስልጣናት በጨረር መጠኑ ዙሪያ ያቀረቡት መረጃ የሀገሪቱ የኒውክሌር ኢጄንሲ ከሰጠው መረጃ ጋር የሚጣረስ እንደሆነ ነው የተነገረው፡፡

 

የሴቬሮድቪንስክ ከተማ የስራ ሀላፊዎች ፍንዳታውን ተከትሎ ከመደበኛ የጨረር በላይ ለ40 ደቂቃዎች የዘለቀ መሆኑን ሲናገሩ የኒውክሌር ኤጀንሲው በበኩሉ ከመደበኛው በላይ የሆነው የጨረር መጠን ከ 2 ሰዓት ከ30 ደቂቃ በላይ መቆየቱን ገልጿል፡፡

ፍንዳታው ተከትሎ በአካባቢው ማህበረሰብ የተለየ ፍርሃትና ድንጋጤን መፍጠሩ የተጠቆመ ሲሆን፥ ነዋሪዎችም የጨርር መጠን ለመቀነስ የሚያስችለውን መሳሪያ ለመግዛት ጥረት ሲያደርጉ ነበረ ተብሏል፡፡

ፍንዳታው በተከሰተበት አከባቢ የሚገኙ ባለስልጣናት ነዋሪዎች ከዕሮብ ጀምሮ ለቀው እንዲወጡ ማሳሰቢያ ቢሰጡም ሌሎች የሩሲያ ባለስልጣናት ግን ስሜት የማይሰጥ በማለት  ውሳኔውን ተቃውመዋል፡፡

ምንጭ፡- ቢቢሲ

You might also like
Comments
Loading...