Fana: At a Speed of Life!

በምዕራብ ኢትዮጵያ ቀጠና የሚገኙ ክልሎች የጋራ መድረክ በአሶሳ ከተማ እየተካሄደ ነው

አዲስ አበባ፣ ነሃሴ 13፣ 2011 (ኤፍ.ቢ.ሲ) በምዕራብ ኢትዮጵያ ቀጠና የሚገኙ ክልሎች የጋራ መድረክ ከዛሬ ጀምሮ በአሶሳ ከተማ እየተካሄደ ነው።

መድረኩ በምዕራብ ኢትዮጵያ ቀጠና የሚገኙ ክልሎችን ግንኙነት በማጠናከር የህዝቦቹን የልማት እና የሰላም ተጠቃሚነ ማጎልበት የሚያስችል ነው ተብሏል።

በውይይት መድረኩ ላይ የአማራ፣ የቤኒሻንጉል ጉሙዝ፣ ኦሮሚያና የጋምቤላ ክልል ምክር ቤቶች አፈ-ጉባኤዎች እየተሳተፉ ይገኛል።

በመድረኩ ላይ የምዕራብ ኢትዮጵያ ህዝቦችን ታሪካዊ እና ባህላዊ ትስስር የሚያሳዩ እና በፌዴራሊዝምና በመንግስታት ግንኙነት ላይ ያተኮሩ ጽሁፎች በምሁራን ቀርበው ውይይት ይደረግባቸዋል ነው የተባለው።

መድረኩን የፌዴሬሽን ምክር ቤት ከኦሮሚያና ከቤኒሻንጉል ጉሙዝ ክልል የጋራ የሰላምና የልማት ማስተባበሪያ ጽህፈት ቤት ጋር በመተባባር እንዳዘጋጀው የማስተባበሪያ ምክር ቤት ምክትል ኃላፊ አቶ ኮማንደር ወርቁ ገልጸዋል።

የቤኒሻንጉል ጉሙዝ ክልል ምክር ቤት አፈ-ጉባዔ አቶ ሐብታሙ ታዬ ባደረጉት ንግግር፥ በምዕራብ ኢትዮጵያ የሚገኙ ክልሎች አንድነታቸውን በማጠናከር ለሃገር ልማት የሚያደርጉት እንቅስቃሴ እያደገ መምጣቱን ተናግረዋል።

ዋና አፈ-ጉባዔው በመድረኩ ላይ እንደተናገሩት በምዕራብ የሃገሪቱ ክፍል የሚገኙ ክልሎች ከቅርብ ዓመታት ወዲህ በልማትና በሠላም ሕዝቦቻቸውን ተጠቃሚ እያደረጉ ነው።

የክልሎቹ ግንኙነት ዘላቂ ልማት በማስፈን ዋስትና ያለው ዴሞክራሲ እንዲረጋገጥ በሕገ-መንግሥቱ የተቀመጠውን አንድ የኢኮኖሚ ማህበረሰብ ለመገንባት የሚደረገውን ጥረት እያፋጠነ መሆኑንም አስታውቀዋል።

በአንጻሩ ዓለም የደገፈውን ለውጥ ትርጉም መረዳት ያቃታቸውና ለማደናቀፍ የሚሯሯጡ አካላት እንዳሉም ገልጸዋል።

ክልሎቹ በድርጊቱ በቀጥታም ሆነ በተዘዋዋሪ የተሳተፉትን ለፍርድ በማቅረብ የሕግ የበላይነት እንዲከበር ጥረት ማድረጋቸውንና በርካታዎቹ ለፍርድ መቅረባቸውን አስታውሰዋል።

መድረኩ ለሁለት ቀናት የሚቆይ ሲሆን፥ የምዕራብ ኢትዮጵያ ህዝቦችን ሁለንተናዊ ሁኔታ፣ ፌዴራሊዝምና የሰላም እሴት ግንባታ፣ የቤኒሻንጉል ጉሙዝና የኦሮሚያ ዞኖችና ወረዳዎች የጋራ ልማትና ሰላም ስምምነት ይፈረማል ተብሎ ይጠበቃል።

 

ተጨማሪ መረጃ ከኢትዮጵያ ዜና አገልግሎት

 

You might also like
Comments
Loading...