Fana: At a Speed of Life!

በመዲናዋ ጠዋትና ማታ ላይ የሚስተዋለውን የትራንስፖርት ችግር ለመቅረፍ እየተሰራ ነው

አዲስ አበባ፣ ነሃሴ 7፣ 2011 (ኤፍ.ቢ.ሲ) የአዲስ አበባ ትራንስፖርት ቢሮ በከተማዋ ጥዋትና ማታ ላይ የሚስተዋለውን የትራንስፖርት ችግር ለመቅረፍ እየሰራ መሆኑን አስታውቋል።

ቢሮው ጉዳዩን አስመልክቶ የዳሰሳ ጥናት ማካሄዱን የገለጸ ሲሆን ፥ በዚህም ችግሩ ይበልጥ የሚስተዋልባቸውን መስመሮች መለየታቸው ነው የተገለጸው።

በዚህ መሰረትም በሁለት መስመሮች ከነበረው ታሪፍ ላይ 50 በመቶ ጭማሪ በማድረግ የሙከራ ስራ ማስጀመሩን አስታውቋል።

የአዲስ አበባ ትራንስፖርት ቢሮ ምክትል ሃላፊ አቶ ጆኒ ተረፈ ለፋና ብሮድካስቲንግ ኮርፖሬት እንደገለጹት፥የታሪፍ ጭማሪው የተደረገባቸው ከፒያሳ – አዲሱ ገብያ እና ከአምባሳደር – 4 ኪሎ ቱሪስት ሆቴል ያሉት መስመሮች ናቸው።

ጭማሪውም በመስመሮቹ ጠዋት እና ማታ ላይ የሚስተዋለውን የትራንስፖርት ችግር ለማቃለል በማለም የተደረገ መሆኑን ተናግረዋል።

በቀጣይም ማሻሻያው በሌሎች የትራንስፖርት መስመሮች ላይ ተግባራዊ የሚደረግ መሆኑን ሃላፊው ጠቁመዋል።

ይሁን እንጂ የተደረገውን ጭማሪ አስመልክቶ ቅድሚያ የግንዛቤ ማስጨበጥ ስራ ባለመሰራቱ ምክንያት በአሽከርካሪዎችና በተጠቃሚዎች መካከል አለመግባባት መስተዋሉን ፋና ብሮድካስቲንግ ኮርፖሬት ቅኝት ባደረገባቸው መስመሮች ለመታዘብ ተችሏል።

የአዲስ አበባ ትራንሰፖርት ቢሮ በበኩሉ ችግሩን ሙሉ ለሙሉ ለማቃለል የብዙሃን ትራንስፖርት ስምሪትን በስፋት ለማዳረስ እየሰራ መሆኑን አስታውቋል።

በሲሳይ ጌትነት

You might also like
Comments
Loading...