Fana: At a Speed of Life!

በመዲናዋ ህፃናት የመጀመሪያ ደረጃ ትምህርት እስኪጀምሩ ድረስ እንክብካቤ የሚያገኙበት ፕሮጀክት ተቀርጿል- አስተዳደሩ

አዲስ አበባ፣ ነሃሴ 11፣ 2011 (ኤፍ.ቢ.ሲ) በአዲስ አበባ ከተማ አስተዳደር የሚገኙ ህፃናት ከውልደታቸው ጀምሮ የመጀመሪያ ደረጃ ትምህርት እስኪጀምሩ ድረስ እንክብካቤ የሚያገኙበት ፕሮጀክት መቀረፁ ተገለፀ።
 
በዚህም በአዲስ አበባ በሚገኙ ሁሉም የኮንዶሚኒየም ሳይቶች መጫዎችን ያካተቱ የህፃናት እንክብካቤ ማእከላት ይገነባሉ ተብሏል፡፡
 
ይህን ለማድረግ የ2012 መሪ እቅድ መዘጋጀቱ የተገለፀ ሲሆን የአዲስ አበባ ከተማ አስተዳደር ካቢኔ መሪ እቅዱ ተግባራዊ እንዲሆን አፅድቆታል።
 
ፕሮጀክቱ “የነገ ተስፋ ህፃናት ለአዲስ አበባ” የሚል ስያሜን የያዘ ሲሆን በመዲናዋ በሚገኙ የመንግስት እና የግል ተቋማት የተማላ የህጻናት ማቆያ እንዲኖራቸው ድጋፍ ይደረጋል ተብሏል።
 
በዚህ ፕሮጀክት መሰረት ህጻናቱ ከውልደታቸው እስከ እድገታቸው ድረስ ጥብቅ የጤናና የአመጋገብ ክትትል ይደረግላቸዋል ተብሏል፡፡
 
ለችግር ተጋላጭና የኑሮ አቅማቸው ደከም ላሉት ደግሞ በጤና ኤክስቴንሽን ባለሙያዎች አማካኝነት የቤት ለቤት ክትትል እንደሚደረግላቸው ነው የተነገረው፡፡
 
በመንግስትም ሆነ በግል ትምህርትቤቶች ህጻናት የመጀመሪያ ደረጃ ትምህርት ከመጀመራቸው በፊት ለአእምሮአዊም እና አካላዊ ዝግጅት የሚያደርጉበት ማእከላት ይቋቋማሉ።
 
በፕሮጀክቱ መሰረት በተመረጡ አካባቢዎች ክፍት የህፃናት መጫወቻ ስፍራዎች የሚገነቡ ሲሆን በየሳምንቱ እሁድ የተወሰኑ የተሽከርካሪ መንገዶች ዝግ በማድረግ ለህጻናት መጫወቻነት ያገለግላሉ ተብሏል፡፡
 
ይህ መሪ እቅድ የከተማ አስተዳደሩ ጤናቸው የተጠበቀና ብቁ አእምሮ ያላቸው ህጻናት ለመፍጠር የያዘው ግዙፍ እቅድ አካል እንደሆነ ተጠቁሟል፡፡
 
አገልግሎቱን በመጪው አመት ለመጀመር የቅድመ ዝግጅት ስራዎች እየተከናወኑ እንደሚገኝ የከተማ አስተዳደሩ አስታውቋል፡፡
You might also like
Comments
Loading...