Fana: At a Speed of Life!

በመኸር ምርት የተባይ ጉዳትን ለመከላከል ከ62 ሺህ ሊትር በላይ ኬሚካል እየተሰራጨ ነው

አዲስ አበባ ፣ ነሃሴ 15 ፣ 2011 (ኤፍ ቢ ሲ) በመኸር ምርት ላይ ተባይ ጉዳት እንዳያደርስ ከ62 ሺህ ሊትር በላይ ኬሚካል እየተሰራጨ መሆኑን የግብርና ሚኒስቴር ገለጸ።

ከመኸር እርሻ ከ13 ነጥብ 5 ሚሊየን በላይ ሄክታር መሬት በዘር በመሸፈን ከ400 ሚሊየን ኩንታል በላይ ምርት ለመሰብሰብ እቅድ ተቀምጧል።

የግብርና ሚኒስቴርም ይህን እቅድ ለማሳካት ከማሳ ዝግጅት እስከ ምርት መሰብሰበ ባለው ሂደት ድረስ የድጋፍና የክትትል ስራ እያከናወነ መሆኑን ይገልጻል።

አስተያየታቸውን ለፋና ብሮድካስቲንግ ኮርፖሬት የሰጡ አንዳንድ አርሶ አደሮች ደግሞ እየታየ ያለው የሰብል በሽታ ስጋት እንደፈጠረባቸው ይናገራሉ።

በተለይም በሰሜን ሸዋ ዞን አካባቢ የሚገኙ አርሶ አደሮች የጸረ ተባይ ኬሚካል አቅርቦት ትኩረት እንዲሰጠው ጠይቀዋል።

በግብርና ሚኒስቴር የጸረ ተባይ መከላከል ዳይሬክተር አቶ ወልደሐዋርያት አሰፋ የተባይ ስርጭቱን ምልከታ በማድረግ የመጀመሪያ ዙር የኬሚካል አቅርቦት እየተሰራጨ መሆኑን ተናግረዋል።

የአየር ንብረቱን ተከትለው የሚከሰቱና መደበኛ የሚባለውን የተባይ መስፋፋት ቁጥጥር ለማድረግም ካለፈው መጋቢት ወር ጀምሮ ቅድመ ዝግጅት መደረጉንም አስታውሰዋል።

የስንዴ ዋግ እንዳይከሰት ጥረት ተደርጓል የሚሉት ዳይሬክተሩ፥ 62 ሺህ ሊትር ኬሚካል ከ45 ሚሊየን ብር በላይ በሆነ ወጪ ግዥ ተፈጽሞ ለአርሶ አደሩ የማሰራጨት ስራ እየተሰራ ነው ብለዋል።

የስርጭት ሂደቱ ላይም ቁጥጥር በማድረግ ተደራሽነቱን የማረጋገጥ ስራ ይሰራልም ነው ያሉት።

 

 

 

በሃይለየሱስ መኮንን

You might also like
Comments
Loading...