Fana: At a Speed of Life!

በህገ ወጥ መልኩ ሊገባ የነበረ 9 ነጥብ 5 ሚሊየን ብር የሚገመት የብር ጌጣጌጥና 520 የሞባይል ቀፎ ተያዘ  

አዲስ አበባ ፣ ነሃሴ 15 ፣ 2011 (ኤፍ ቢ ሲ) 9 ነጥብ 5 ሚሊየን ብር የሚገመት የብር ጌጣጌጥና 520 የሞባይል ቀፎ በኮንትሮባንድ ሲንቀሳቀስ መያዙን የገቢዎች ሚኒስቴር አስታወቀ።

ሚኒስቴሩ በዛሬው እለት በያቤሎ መቅረጫ ጣቢያ ግምታዊ ዋጋው 9 ነጥብ 5 ሚሊየን ብር የሆነ 190 ኪሎ ግራም የብር ጌጣጌጥ እና ግምታዊ ዋጋቸው 312 ሺህ ብር የሆኑ 520 የሞባይል ስልክ ቀፎዎች መያዙን አስታውቋል።

ንብረቶቹ የሰሌዳ ቁጥሩ ኮድ 3 A – 59037 አ.አ በሆነ ተሽከርካሪ ሲንቀሳቀሱ የተያዙ ናቸው።፡

ከዚህ ባለፈም ሚኒስቴሩ በዛሬው እለት በጅግጅጋ ቶጎ ጫሌ የመቅረጫ ጣቢያ ቅያሪ ጫማው ውስጥ በመደበቅ የውጭ ምንዛሪ ለማሳለፍ የሞከረን ግለሰብ በቁጥጥር ስር አውሏል።

ልዑል ገብረየስ የተባለው ግለሰብ 53 ሺህ የአሜሪካ ዶላር በህገ ወጥ መልኩ ከሃገር ሊያስወጣ ሲል፥ በጅግጅጋ ጉምሩክ የቶጎ ጫሌ ፈታሾችና የፌደራል ፖሊስ አባላት መያዙን ከሚኒስቴሩ ያገኘነው መረጃ ያመላክታል።

በተመሳሳይ በትናንትናው እለት ከምሽቱ 5 ሰዓት አካባቢ የሰሌዳ ቁጥሩ ኮድ 3 02764 ሱ.ማ የሆነ ባለ ስድስት ጎማ ኒሳን ዩዲ ተሽከርካሪ ግምታዊ ዋጋቸው 2 ሚሊየን ብር የሚሆን የተለያዩ የኮንትሮባንድ እቃዎችን ጭኖ ሊገባ ሲል በቁጥጥር ስር መዋሉ ይታወሳል።

 

You might also like
Comments
Loading...