Fana: At a Speed of Life!

በሀገር አቀፍ ደረጃ ለተተከሉ ችግኞች እንክብካቤ እየተደረገ ነው – ኮሚሽኑ

አዲስ አበባ፣ ነሃሴ 17፣ 2011 (ኤፍ.ቢ.ሲ) በሀገር አቀፍ ደረጃ የተተከሉ ችግኞች አሁን ላይ ያሉበትን ደረጃ የመከታተልና ያልፀደቁትን በአዲስ ችግኝ የመተካት ሂደት እየተካሄደ መሆኑን የአካባቢ፣ ደን እና የአየር ንብረት ለውጥ ኮሚሽን አስታወቀ።

የኮሚሽኑ ኮሚሽነር ፕሮፌሰር ፍቃዱ በየነ ለፋና ብሮድካስቲንግ ኮርፖሬት እንደተናገሩት፥ በሀገር አቀፍ ደረጃ የተቋቋመው ብሄራዊ የቴክኒክ ኮሚቴ እና ሌሎች ተቋማት የክትትል እና ድጋፍ ስራ እያከናወኑ ነው።

በዋነኝነት ትኩረት ተደርጎ ሲሰራበት የነበረው ለችግኝ ተከላ ሲሆን የእንክብካቤ ስራው በተቀናጀ መልኩ እንዲከወን ደግሞ አደረጃጀቶች መፈጠራቸውን ኮሚሽኑ አስታውቋል፡፡

የዘመቻ እንቅስቃሴው በተወሰነ መልኩ የተቀዛቀዘ ቢመስልም ኮሚሽኑ እና ሌሎች ባለድርሻ አካላት ስራቸውን እያከናወኑ መሆኑም ነው የተገለፀው።

ኮሚሽነር ፕሮፌሰር ፍቃዱ በየነ በዋናነት ችግኞቹን በባለቤትነት ተረክበው የተከሉት ኢትዮጵያውያን ሀላፊነታቸውን ሊወጡ እንደሚገባም አንስተዋል፡፡

የኦሮሚያ ክልል ከ1 ነጥብ 7 ቢሊየን በላይ ችግኝ መትከሉን የክልሉ የእርሻ እና ተፈጥሮ ሀብት ልማት ቢሮ ምክትል ሃላፊ አቶ እንዳልካቸው ተፈሪ ተናግረዋል፡፡

በመሆኑም ችግኞች የተተከሉባቸውን ስፍራዎች በተለይም በወል መሬቶች ላይ የተተከሉ ችግኞችን ከእንስሳት እና ሰዎች ንክኪ ነፃ ለማድረግ የማጠርና የመንከባከብ ስራ እየተከናወነ መሆኑን ገልፀዋል፡፡

የአማራ ክልል በበኩሉ በክረምቱ ከ1 ነጥብ 5 ቢሊየን በላይ ችግኞች መተከላቸው የተገለፀ ሲሆን፥ ችግኞቹ ከተተከሉ በኋላ አልተዘነጉም ተብሏል፡፡

የክልሉ ግብርና ቢሮ ምክትል ሀላፊ አቶ ማርቆስ ወንዴ በክልሉ ከጳጉሜን ወር ጀምሮ ችግኞችን የመኮትኮት እና ያልፀደቁትን በአዲስ ችግኝ የመተካት ስራ እንደሚከናወን ጠቅሰዋል፡፡

አንዳንድ መስሪያ ቤቶች ጥበቃ መቅጠራቸውን እና ያልፀደቁ ችግኞችን በአዲስ ለመተካትም ችግኞች መግዛታቸውን ተናግረዋል፡፡

የደቡብ ክልልም 1 ነጥብ 5 ቢሊየን ችግኝ የተከለ ሲሆን የክልሉ እርሻ እና ተፈጥሮ ሀብት ቢሮ ከክልሉ ነዋሪዎች ጋር በመተባበር የክትትል ስራ እያከናወነ መሆኑን ጠቁሟል።

በአዲሱ አመት መግቢያም ለአንድ ሳምንት የሚቆይ የእንክብካቤ ስራ እንደሚካሄድ ተነግሯል፡፡

በፋሲካው ታደሰ

ምስል፡-AFP

You might also like
Comments
Loading...