Fana: At a Speed of Life!

ምክር ቤቱ በአስቸኳይ ስብሰባው የምርጫ፣ የፖለቲካ ፓርቲዎች ምዝገባና የምርጫ ሥነ ምግባር አዋጅን አፀደቀ

አዲስ አበባ፣ ነሃሴ 18፣ 2011 (ኤፍ.ቢ.ሲ) የኢፌዴሪ የህዝብ ተወካዮች ምክር ቤት በዛሬው እለት አስቸኳይ ስብሰባውን አካሂዷል።

ምክር ቤቱ ባካሄደው አስቸኳይ ስብሰባው የህግ ፣ ፍትህና ዴሞክራሲ ጉዳዮች ቋሚ ኮሚቴ ያቀረበለትን የኢትዮጵያ ምርጫና የፖለቲካ ፓርቲዎች ረቂቅ አዋጅን ተመልክቷል።

ቋሚ ኮሚቴው አዋጁን ባቀረበበት ወቅት የአዋጁ ስያሜን ጨምሮ በአዋጁ 149 በሚሆኑ አንቀጾች ላይ ማሻሻያ መደረጉን አስታውቋል።

የአዋጁ ስያሜም የኢትዮጵያ የምርጫ፣ የፖለቲካ ፓርቲዎች ምዝገባና የምርጫ ሥነ ምግባር አዋጅ በሚል መስተካሉ ነው የተገለፀው።

በአዋጁም በፖለቲካ ፓርቲዎች እንቅሥቃሴ፣ በምርጫ ተወዳዳሪዎች እንቅስቃሴ፣ በምርጫ ወቅት መከናወን ባለባቸው ህጋዊ እንቅስቃሴዎች፣ በህግ አፈጻጸም፣ በመገናኛ ብዙሀን አጠቃቀምና በሌሎችም ጉዳዮች ላይ ማሻሻያዎች ተደርጓል።

በአዋጅ ማሻሻያ ላይ ወንድ እና ሴት ተወዳዳሪዎች እኩል ድምጽ ቢያገኙ ሴት ተወዳዳሪዋ እንደምታሸንፍ አስቀምጦ የነበረ ቢሆንም፥ ምክር ቤቱ ሀሳቡ ከፆታ እኩልነት ጋር የሚፃረር በመሆኑ ውድቅ አድርጎታል።

በማሻሻያ አዋጁ አዋጁን ለማስፈጸም የህዝብ ተወካዮች ምክር ቤት ደንብ ሊያወጣ እንደሚችልና መመሪያውን የሚያወጣው ደግሞ ምርጫ ቦርድ እንደሆነ ተገልጿል።

አዋጁ በዋናነት የምርጫ ስርአት፣ የምርጫ አፈፃጸም፣ የፖለቲካ ፓርቲዎች አመሰራረትና አስተዳደር፣ የምርጫ ስነ ምግባር፣ በምርጫ ሂደት የሚነሱ ክርክሮች የሚዳኙበትንና የሚፈቱበትን የአሰራር ስርኣት የያዘ፣ የፖለቲካ ፓርቲዎች የሚቀናጁበት፣ እንደአዲስ የሚዋሀዱበትን ዝርዝር የያዘ እንዲሁም ጉዳዩ የሚመለከታቸው አካላት የተሳተፉበት መሆኑን ተብራርቷል።

በተጨማሪም ከዚህ በፊት በስፋት ይስተዋሉ የነበሩ በርካታ ክፍተቶችን በመሙላት በምርጫው ሂደትና ውጤት ላይ የበለጠ ተዓማኒነትን ለመፍጠር የተዘጋጀ እንደሆነ ተገልጿል።

የኢትዮጵያ ምርጫና የፖለቲካ ፓርቲዎች አዋጅ ላይ ከፖለቲካ ፓርቲዎች ምስረታ ጀምሮ እስከ የመስራች ቁጥር አባላት ድረስ አዳዲስ አሰራሮችን እንዳካተተም ተገልጿል።

ከእነዚህም ውስጥ የመንግስት ሰራተኞች ለምርጫ በእጩነት ከተመዘገቡበት ጊዜ ጀምሮ የምርጫ ሂደቱ እስኪጠናቀቅ ድረስ ከስራ ገበታቸው በጊዜያዊነት እንደሚለቁና ደመወዝና ጥቅማ ጥቅማቸውም እንደማይከር የሚለው አንዱ ነው።

እንዲሁም አንድ ሀገር አቀፍ የፖለቲካ ፓርቲ ለመመስረት ቢያንስ 10 ሺህ እንዲሁም አንድ የክልል ፓርቲ ለመመስረት ደግሞ ቢያንስ 4 ሺህ አባላት እንደሚያስፈልጉ በአዋጁ ተደንግጓል።

You might also like
Comments
Loading...