Fana: At a Speed of Life!

ምርት ገበያው በበጀት አመቱ 681 ሺህ ቶን ምርት በ33 ነጥብ 8 ቢሊየን ብር አገበያየ

አዲስ አበባ ፣ ሃምሌ 26 ፣ 2011 (ኤፍ ቢ ሲ) የኢትዮጵያ ምርት ገበያ በበጀት አመቱ 681 ሺህ ቶን ምርት በ33 ነጥብ 8 ቢሊየን ብር ማገበያየቱን አስታወቀ።

የምርት ገበያው ዋና ስራ አስፈጻሚ አቶ ወንድማገኘሁ ነገራ ምርት ገበያው በበጀት አመቱ፥ 763 ሺህ 151 ቶን ምርት ለመቀበል አቅዶ 711 ሺህ 850 ቶን ምርት መቀበሉን ገልጸዋል።

አያይዘውም 673 ሺህ 57 ቶን ምርት ለማገበያየት ታቅዶ 681 ሺህ 845 ቶን ምርት ማገበያየት መቻሉንም ተናግረዋል።

ከዚህ ውስጥም ቡና 45 በመቶ እንዲሁም ሰሊጥ 34 በመቶ ድርሻን መያዛቸውንም ነው የተናገሩት።

በተጨማሪም 30 ነጥብ 3 ቢሊየን ብር ዋጋ ያለው ምርት ለማገበያየት ታቅዶ 33 ነጥብ 8 ቢሊየን ብር ተገበያይቷልም ነው ያሉት።

በበጀት አመቱ አኩሪ አተርና ሽምብራ ወደ ዘመናዊ የግብይት ሥርዓቱ መግባታቸውን አስታውሰው፥ ባለፉት አምስት ወራትም 875 ሺህ ኩንታል አኩሪ አተርና 400 ኩንታል ሽምብራ ማገበያየት መቻሉን አውስተዋል።

ከዚህ ባለፈም የነጭ ቦሎቄ ግብይት ከእቅዱ በ65 በመቶ አድጎ 600 ሺህ ኩንታል ለማገበያየት መቻሉን ጠቅሰዋል።

ከማገበያየት ባለፈም በበጀት አመቱ በ20 ሚሊየን ብር በሀዋሳና ሁመራ የተገነቡት የኤሌክትሮኒክ የግብይት ማዕከላት ተመርቀው ስራ መጀመራቸውን አስረድተዋል።

ከዚህ ባለፈም ምርት ገበያው ተጨማሪ ቅርንጫፎችን በመክፈት ዘመናዊ የመጋዘን አገልግሎት መስጠት የሚያስችሉ መሳሪያዎችና ዲጂታል ሚዛኖችን በተወሰኑ ቅርንጫፎች መትከሉንም ጠቁመዋል።

እንዲሁም በተለያዩ አካባቢዎች መጋዘኖች፣ የላቦራቶሪ፣ የናሙና መውሰጃና ቢሮዎች ግንባታ እየተከናወነ ይገኛል ብለዋል።

የመጋዘን ጥበት፣ የቡና ዋጋ ማሽቆልቆል፣ የምርት መጠን መቀነስ እንዲሁም በጥራጥሬ አቅርቦት ላይ የኮንትሮባንድ ንግድ የፈጠረው ተፅዕኖ በበጀት አመቱ ያጋጠሙ ችግሮች መሆናቸውንም አንስተዋል።

የምርት ገበያው ባለፉት 11 አመታት ውስጥ 5 ነጥብ 7 ሚሊየን ቶን ምርትን በ237 ቢሊየን ብር አገበያይቷል።

 

 

 

 

 

You might also like
Comments
Loading...