Fana: At a Speed of Life!

ሜቴክ ቅድመ ክፍያቸው በባከኑ የምርት ትዕዛዞች ምክንያት የ1 ነጥብ 7 ቢሊየን ብር ኪሳራ እንደገጠመው ተገለፀ

አዲስ አበባ፣ ነሃሴ 15፣ 2011 (ኤፍ.ቢ.ሲ) የኢትዮጵያ ብረታ ብረትና ኢንጂነሪንግ ኮርፖሬሽን (ሜቴክ) ሜቴክ ቅድመ ክፍያቸው በባከኑ የምርት ትዕዛዞች ምክንያት የ1 ነጥብ 7 ቢሊየን ብር ኪሳራ እንደገጠመው ተገለፀ፡፡

ኮርፖሬሽኑ ካሉት 14 ኢንዱስትሪዎች በተሻለና በሙሉ አቅም በምርት ላይ የሚገኙት አራቱ መሆናቸውን የኮርፖሬሽኑ ዋና ዳይሬክተር ብርጋዴር ጀነራል አህመድ አምዛ ከፋና ብሮድካስቲንግ ኮርፖሬት ጋር በነበራቸው ቆይታ ወቅት ተናግረዋል፡፡

የብረታ ብረትና ኢንጂነሪንግ ኮርፖሬሽን ሜቴክ በበርካታ ቀውስ ውስጥ የሚገኝ ቢሆንም ተቋሙ በ2011 በጀት ዓመት ከ9 ቢሊየን ብር በላይ ሽያጭ በመፈጸም 2 ነጥብ 3 ቢሊየን ብር ትርፍ ለማግኘት አቅዶ ነበር፡፡

ነገር ግን ተቋሙ በበጀት ዓመቱ ከማማትረፍ ይልቅ ኪሳራ ውስጥ እንደገባ ነው የተገለፀው፡፡

ለመክሰሩ ምክንያት ሁሉም ኢንዱስትሪዎች ወደ ምርት አለመግባታቸው አንዱ ቢሆንም በዋነኝነት ግን ቅድመ ክፍያ የተፈጸመባቸው ምርቶች ናቸው ተብሏል።

ውል ተፈፅሞ እና ገንዘቡ ገቢ ባልሆነበት ሁኔታ ምርቶቹን በውሉ መሰረት አምርቶ ማስረከብ ግድ ይለዋል።
በዚህ ምክንያት ወጪ እንጂ ገቢ ባለመኖሩ ተቋም ትርፋማ እንዳልሆነ እና 1 ነጥብ 7 ቢሊየን ብር ኪሳራ እንደገጠመው ተጠቁሟል፡፡

ተቋሙ በ2012 በጀት ዓመት የተለያዩ የማስተካከያ እርምጃዎችን በመውሰድ ግማሽ ቢሊየን ብር ትርፍ ለማሳካት አቅዷል፡፡

በበጀት ዓመቱ ከ8 ቢሊየን ብር በላይ ሽያጭ ለመፈጸም የታቀደው ተጨባጭ መረጃዎችን መሰረት በማድረግ መሆኑ ተቋሙ አስታውቋል፡፡

የኮርፖሬሽኑ ዋና ዳይሬክተር ብርጋዴር ጀነራል አህመድ አምዛ አሁን ላይ ሁሉንም ኢንዱስትሪዎች ወደ ስራ እየገቡ መሆኑን አንስተዋል።

እንዲሁም ኢንዱስትሪዎቹ የምርት መጠናቸውን እንዲጨምሩ የ24 ሰዓት ስራን ተግባራዊ ለማድረግ እንቅስቃሴ እንደተጀመረ ተጠቁሟል፡፡

ከዚህ ባለፈ ተቋሙ ዋነኛ ማነቆ የሆነበትን ቅድመ ክፍያቸው የተፈፀሙ ምርቶች እየተጠናቀቁ በመሆናቸው በቀጣይ ትርፋማ ለመሆን እንደሚያስችል ዋና ዳይሬክተሩ ገልፀዋል፡፡

በተጨማሪም በ2012 በጀት ዓመት የተሻለ ስራ በመስራት የጥራት ማረጋገጫን በማግኘት ወደ ውጪ ምርቶቹን በመላክ ተቋሙ ትርፋማ ይሆናል ተብሎ ይጠበቃል፡፡

ተቋሙ በበጀት ዓመቱ ሁለት ወር ባልሞላ ጊዜ ውስጥ ከ1 ቢሊየን ብር በላይ ሽያጭ መፈጸሙ ለእቅዱ መሳካት ከወዲሁ በማሳያነት ተመላክቷል።

በሃይለእየሱስ ስዩም

You might also like
Comments
Loading...