Fana: At a Speed of Life!

ማንቼስተር ሲቲ እና ሊቨርፑል ሊጉን በድል ጀምረውታል

አዲስ አበባ ፣ ነሃሴ 4 ፣ 2011 (ኤፍ ቢ ሲ) የ2019/20 የእንግሊዝ ፕሪሚየር ሊግ ትናንት ምሽት በተካሄደ አንድ ጨዋታ ተጀምሯል።

በጨዋታው ሊቨርፑል ኖርዊች ሲቲን አስተናግዶ 4 ለ 1 በሆነ ውጤት በማሸነፍ ሊጉን በድል ጀምሮታል።

ሳላህ፣ ቫንዳይክ፣ ኦሪጊ እና እንዲሁም የኖርዊቹ ሃንሌይ በራሱ መረብ ላይ ለሊቨርፑል አስቆጥረዋል፤ ፐኪ ደግሞ ለኖርዊች የማስተዛዘኛዋን ጎል ማስቆጠር ችሏል።

ዛሬ በተካሄዱ ጨዋታዎች ደግሞ የአምናው የሊጉ አሸናፊ ማንቼስተር ሲቲ ወደ ለንደን ስታዲየም አምርቶ ዌስትሃምን 5 ለ 0 በሆነ ውጤት ማሸነፍ ችሏል።

ራሂም ስተርሊንግም በመክፈቻው ጨዋታ ሃት ሪክ ሰርቷል፤ ጋብርኤል የሱስ እና ኩን አጉዌሮ ቀሪዎቹን የድል ጎሎች አስቆጥረዋል።

በሌሎች ጨዋታዎች ደግሞ በርንማውዝ ከሼፊልድ ዩናይትድ አንድ አቻ ሲለያዩ፥ ሜፋም እና ሻርፕ ጎሎቹን አስቆጥረዋል።

በርንሌይ ሳውዝሃምፕተንን አስተናግዶ 3 ለ 0 ሲያሸንፍ፥ ባርነስ ሁለት እንዲሁም በርግ ጉድመንድሰን አንድ ጎል ማስቆጠር ችለዋል።

ብራይተን ደግሞ ወደ ቪካሬጅ ሮድ አቅንቶ በአንዶኔ እና ሙዋፔ እንዲሁም ዶኮሬ በራሱ መረብ ላይ ባስቆጠረው ጎል ዋትፎርድን 3 ለ 0 አሸንፏል።

ክሪስታል ፓላስ ከኤቨርተን ያደረጉት ጨዋታ ደግሞ ያለምን ጎል በአቻ ውጤት ተጠናቋል።

 

You might also like
Comments
Loading...