Fana: At a Speed of Life!

መቐለ 70 እንደርታ ወደ ኢኳቴሪያል ጊኒ ሲጓዝ፤ የታንዛኒያው አዛም ባህር ዳር ገብቷል

አዲስ አበባ ፣ ነሐሴ 2 ፣ 2011 (ኤፍ.ቢ.ሲ) የካፍ ቻምፒየንስ ሊግ እና የኮንፌዴሬሽን ዋንጫ የመጀመሪያ ዙር የማጣሪያ ጨዋታዎች የፊታችን ቅዳሜ እና እሁድ ይካሄዳሉ።

በካፍ ቻምፒየንስ ሊግ ጨዋታ ኢትዮጵያን በመወከል የሚሳተፈው መቐለ 70 እንድርታ የማጣሪያ ጨዋታውን ለማድረግ በትናንትናው እለት  ኢኳቴሪያል ጊኒ ተጉዟል።

የ2011 ዓም የኢትዮጵያ ፕሪሚየር ሊግ ሻምፒዮኑ መቐለ 70 እንድርታ  ለመጀመሪያ ጊዜ በካፍ ቻምፒየንስ ሊግ ለመሳተፍ ነው ወደ ኢኳቴሪያል ጊኒ  ማላቦ ያቀናው።

በማላቦ ከካኖ ስፖርትስ አካዳሚ ጋር የመጀመሪያ የማጣሪያ ጨዋታቸውን የሚያደርጉት መቐለ 70 እንድርታዎች  አዳዲስ ፈራሚዎቹን  ታፈሰ ሰርካና ኤፍሬም አሻሞ በመያዝ ነው የተጓዙት።

ጨዋታው ቅዳሜ 11 ሰዓት ላይ በፓብሎ ቦያስ ደሳምፓካ ስታዲየም የሚደረግ ይሆናል።

በተያያዘ ዜና በካፍ ኮንፌዴሬሽን ማጣሪያ ጨዋታ ከፋሲል ከነማ ጋር በባህር ዳር ስታዲየም የሚጫወተው የታንዛኒያው አዛም እግር ኳስ ክለብ ባህርዳር መግባቱ ታውቃል

የታንዛኒያው አዛም እግርኳስ ልዑካን ቡድን በትናንትናው እለት ነው ባህርዳር ከተማ የገቡት።

የፋሲል ከነማ እና የታንዛኒያው አዛም እግር ኳስ ክለብ ጨዋታም የፊታችን እሁድ ከቀኑ 10 ሰዓት በባህር ዳር ስታዲየም የሚደረግ ይሆናል።

ካፍ በቅርቡ በኢትዮጵያ በሚገኙ 6 ስታዲየሞች ላይ ግምገማ ካደረገ በኋላ የካፍን ዝቅተኛ መስፈርት ሟሟላት የሚችሉ ስታዲየሞች እንደሌሉ ማሳወቁ ይታወሳል።

ሆኖም ግን የመቐለ እና የባህርዳር ስታዲየሞች  የካፍ ወድድሮችን እንዲያዘጋጁ በጊዜ ገደብ ፈቃድ አግኝተዋል።

 

You might also like
Comments
Loading...