Fana: At a Speed of Life!

ሌተናል ጄኔራል አብድል ቡርሃን የሱዳን ሉዓላዊ ሸንጎ መሪ ሆነው ተመረጡ

አዲስ አበባ ፣ ነሃሴ 15 ፣ 2011 (ኤፍ ቢ ሲ) የሱዳን ወታደራዊ የሽግግር ምክር ቤት ሊቀ መንበር ሌተናል ጄኔራል አብድል ፈታ ቡርሃን አዲስ የተቋቋመው የሱዳን ሉዓላዊ ምክር ቤት መሪ ሆነው ተመረጡ።

በትናንትናው እለት አምስት ወታደራዊ እና ስድስት የሲቪል ተወካዮች በድምሩ 11 አባላት ያሉትን ሉዓላዊ ምክር ቤት መመስረቱ ይታወሳል።

ቡርሃን ምክር ቤቱን ለሚቀጥሉት 21 ወራት እንዲመሩ በዛሬው እለት ቃለ መሀላ ፈጽመዋል።

የሃገሪቱ ወታደራዊ የሽግግር ምክር ቤት እና ተቀናቃኝ ሃይሎች ስልጣን በመጋራት ለ39 ወራት የሽግግር ጊዜ እንዲኖር መስማማታቸው የሚታወስ ነው።

በዚህ ሂደት የተመሰረተው ሉዓላዊ ሸንጎ በእርሳቸው የሚመራ ሲሆን፥ መንግስታዊ ስራዎችን የሚያከናውን ጠቅላይ ሚኒስትርና የመንግስት ካቢኔ ሹመትም ይጠበቃል።

በዚህም ከሲቪል ጠቅላይ ሚኒስትር ሲመረጥ የመከላከያና የሃገር ውስጥ ሚኒስትርነት ቦታዎች ደግሞ ከወታደራዊ ምክር ቤቱ እንደሚሰየም ነው የሚጠበቀው።

የእርሳቸው የ21 ወራት የመሪነት ጊዜ ሲያበቃም ከሲቪል ተወካዮች የተመረጠው ግለሰብ የሃገሪቱ ምርጫ እስከሚካሄድበት የፈረንጆቹ 2022 ድረስ ሸንጎውን ይመራል።

ሱዳንን ለ30 ዓመታት የመሯት የቀድሞው ፕሬዚዳንት ኦማር ሃሰን አልበሽር ባሳለፍነው ሚያዚያ ወር ላይ ከስልጣን መውረዳቸው ይታወሳል።

አሁን ላይ የሽግግር ሉዓላዊ ሸንጎው እና የመንግስት ካቢኔ አባል ሆነው የሚሾሙ ግለሰቦች፥ በፈረንጆቹ 2022 ምርጫ እንዳይወዳደሩ ስምምነት ላይ ተደርሷል።

 

 

ምንጭ፦ ቢቢሲ

You might also like
Comments
Loading...