Fana: At a Speed of Life!

ህጋዊ የስራ ስምሪት ስርዓቱ የተንዛዛ የአሰራር ሂደት መከተሉ ችግር ፈጥሯል – የውጭ ሃገር የስራ ስምሪት አገናኝ ኤጀንሲዎች ማህበር

አዲስ አበባ ፣ ነሃሴ 8 ፣ 2011 (ኤፍ ቢ ሲ) ህጋዊ የስራ ስምሪት ስርዓቱ የተንዛዛ የአሰራር ሂደት መከተሉ ሰራተኞችን በሚፈለገው ፍጥነት ለሃገራት ማቅረብ እንዳይቻል ማድረጉን የውጭ ሃገር የስራ ስምሪት አገናኝ ኤጀንሲዎች ማህበር ገለጸ።

ዜጎች በውጭ ሃገራት የስራ ስምሪት እንዲያደርጉ ከሳዑዲ ዓረቢያ፣ ኳታርና ጆርዳን ጋር ስምምነት በመፈጸም ህጋዊ የስራ ስምሪቱ ተጀምሯል።

ዜጎችን በውጭ ሀገራት በስራ ለማሰማራትም 535 ኤጀንሲዎች መስፈርቱን አሟልተው ከሰራተኛ ማህበራዊ ሚኒስቴር ፈቃድ አግኝተዋል።

ሆኖም ግን ፈቃድ ከወሰዱ 535 ኤጀንሲዎች ውስጥ በአሁኑ ወቅት ወደ ሶስቱ ሃገራት ሰራተኞችን መላክ የጀመሩት 34 ብቻ ናቸው።

በውጭ ሀገር በህጋዊ መንገድ በስራ ለመሰማራት የሚፈልጉና ለ2 ወራት በቴክኒክና ሙያ የሰለጠኑ ከ14 ሺህ በላይ ዜጎች የብቃት ማረጋገጫ ምዘና አልፈዋል።

ይሁን እንጅ በህጋዊ የውጭ ሃገራት የስራ ስምሪት ወደ ሳዑዲ ዓረቢያ፣ ኳታርና ጆርዳን ውላቸው በሰራተኛ እና ማህበራዊ ሚኒስቴር ፀድቆ የሄዱት ከ350 አይበልጡም።

በሰራተኛ እና ማህበራዊ ጉዳይ ሚኒስቴር የውጭ ሃገር የስራ ስምሪትና የሰራተኞች ደህንነት ጥበቃ ዳይሬክተር ወይዘሮ መሰለች አሰፋ፥ የስራ ፍላጎትን ከማሳወቅ ጀምሮ የሚደረገው ህጋዊነትን የማረጋገጥ ሂደትና የኤጀንሲዎች ሙሉ በሙሉ ወደ ስራ አለመግባት ለቁጥሩ ማነስ ምክንያት መሆኑን ይናገራሉ።

የውጭ ሃገር የስራ ስምሪት አገናኝ ኤጀንሲዎች ማህበር ደግሞ ህጋዊ የስራ ስምሪት ስርዓቱ የተንዛዛ የአሰራር ሂደት መከተሉ ሰራተኞችን በሚፈለገው ፍጥነት ለሃገራት ማቅረብ እንዳይቻል አድርጓል ይላል።

የማህበሩ ፕሬዚዳንት አቶ መልኬ ገብረሚካኤል በሚኒስቴሩ ያለው የተንዛዛ አሰራር ችግር መፍጠሩን ገልጸዋል።

አንድን ሰራተኛ ወደ ውጭ ለመላክ ያለው ሂደት መርዘምም ለስራ ስምሪት ወደ ውጭ የሚሄዱ ዜጎችን ብዛት እንዲቀንስ አድርጎታልም ይላሉ።

ከፖሊስ የሚሰጥ አሻራን አንድ ኤጀንሲ ማግኘነት የሚችለው በሳምንት ለ10 ሰዎች ብቻ መሆኑም ሌላው ችግር የፈጠረ ጉዳይ መሆኑን ጠቅሰዋል።

አሁን ላይ ካለው የተንዛዛ አሰራር ጋር በተያያዘም ተቀባይ ሃገራት እምነት እያጡ መሆኑንና በስራው ኪሳራ ማስተናገዳቸውንም ኤጀንሲዎቹ አስረድተዋል።

 

 

በበላይ ተስፋዬ

 

You might also like
Comments
Loading...