Fana: At a Speed of Life!

520 ሜጋ ዋት ሃይል የማመንጨት አቅም ያለው የእንፋሎት ሃይል ማመንጫ ፕሮጀክት ግንባታ ሊጀመር ነው

አዲስ አበባ፣ ሰኔ 28፣ 2011 (ኤፍ ቢ ሲ) 520 ሜጋ ዋት ሃይል የማመንጨት አቅም ያለው አዲስ የእንፋሎት ሃይል ማመንጫ ፕሮጀክት ግንባታ ሊጀመር መሆኑን የኢትዮጵያ ኢነርጂ ባለስልጣን አስታወቀ።

ባለስልጣኑ በሀገሪቱ አዲስ እና ግዙፍ ሊባል የሚችል የእንፋሎት ሃይል ማመንጫ ፕሮጀክት ሊጀመር መሆኑን ገልጿል።

ፕሮጀክቱ በኦሮሚያ ክልል ምዕራብ አርሲ ዞን የሚገነባ ሲሆን፥ 520 ሜጋ ዋት ሃይል የማመንጨት አቅም ይኖረዋል ተብሏል።
ይህም ሀገሪቱ ከያዘቻቸው ግዙፍ ፕሮጀክቶች ውስጥ አንዱ ሊሆን ይሆናል ነው የተባለው።

ፕሮጀክቱ ከፍተኛ ወጪ ከመጠየቁ አንፃር የሌሎች ሀገራት ድጋፍ እና እርዳታ አስፈላጊ መሆኑ የተገለጸ ሲሆን፥ በመነሻ ደረጃ የአሜሪካ ንግድ እና ልማት ኤጀንሲ ፕሮጀክቱን ለማገዝ ፍላጎት ማሳየቱ ተጠቁሟል።

በባለስልጣን መስሪያ ቤቱ የጂኦተርማል ሃብት ልማት ፍቃድና አስተዳደር ዳይሬክቶሬት ዳይሬክተር ተስፋዬ ካሳ፥ ፕሮጀክቱ በሀገሪቱ ከተለዩ 24 የእንፋሎት ሃይል ማመንጫዎች ውስጥ አንዱና ዋነኛው መሆኑን ተናግረዋል።

እስካሁን ስራውን ከሚሰራው የቱሉ ሞዬ ጂኦተርማል ኩባንያ ጋር በመሆን ፅህፈት ቤቶችን የማቋቋም እና የመንገድ ግንባታ ስራዎችን መከናወናቸውንም አንስተዋል።

ፕሮጀክቱ ውሃን መሰረት አድርገው ከሚሰሩ የሃይል ማመንጫ ፕሮጀክቶች አኳያ የስጋት መጠኑ እጅግ ያነሰ እና የሃገሪቱን የወደፊት የሃይል ፍላጎት ከግምት ውስጥ ያስገባ ነው ብለዋል።

ፕሮጀክቱ የእውቀት ሽግግርን አጠናክሮ መቀጠል ከዘርፉ የሚገኘውን ትልቅ ሃብት በሚገባ ለመጠቀም የመጀመሪያው መንገድ መሆኑን ገልፀዋል።
ኢትዮጵያ ከታዳሽ ሃይሎች አንዱ በሆነው የእንፋሎት ሃይል ዘርፍ ላይ ይህ ነው የሚባል እንቅስቃሴ ባይኖራትም፥ ከ10 ሺህ ሜጋ ዋት በላይ የሚሆን የኢነርጂ ሃብት በሃገሪቱ እንደሚገኝ በቅርብ ጊዜ የወጡ መረጃዎች ያመላክታሉ።

You might also like
Comments
Loading...