Fana: At a Speed of Life!

ጠ/ሚ ዶ/ር አብይ ለቻትሃም ሽልማት ታጩ

አዲስ አበባ፣ ሃምሌ 12፣ 2011 (ኤፍ ቢ ሲ) ጠቅላይ ሚኒስትር ዶክተር አብይ አህመድ በብሪታኒያው ንጉሳዊ አለም አቀፍ ጉዳዮች ቻትሃም ሽልማት በእጩነት ቀረቡ፡፡

ተቋሙ ጠቅላይ ሚኒስትር ዶክተር አብይ በሀገሪቱ ውስጥ ማህበረሰብ አቀፍ ለውጥ ለማምጣት፣ ለፖለቲካ ፓርቲዎች ምቹ ሁኔታን ለመፍጠር እና የመናገር ነፃነትን ለማረጋገጥት ባደረጉት ጥረት ነው ለእጩነት የቀረቡት፡፡

ከኤርትራ ጋር የነበረውን ችግር መቅረፋቸው፣ የሴቶችን እኩልነት ለማረጋገጥ ስኬታማ ስራ እያከናወኑ መሆናቸው እንዲሁም በአፍሪካ ቀንድ ትብብርና ሰላም እንዲፈጠር አስተዋፅኦም ማድረጋቸው በእጩነት እንዲቀርቡ አድርጓቸዋል፡፡

ተቋሙ ባወጣው መግለጫ ጠቅላይ ሚኒስትሩ በርካታ እስረኞችን ከእስር መልቀቃቸውን፣ የካቢኔያቸው 50 በመቶ ሴቶች እንዲሆኑ ማድረጋቸውን እና የተለያዩ ጨቋኝ ህጎችን ለማሻሻል ጥረት በማድረግ ላይ ይገኛሉ ብሏል፡፡

ለዚህ ሽልማት ከጠቅላይ ሚኒስትር ዶክተር አብይ በተጨማሪ የአይስላንድ ጠቅላይ ሚኒስትር ካትሪን ጃኮብስዶቲር እና ሰር ዴቪድ አቴንብራ በእጩነት ቀርበዋል፡፡

ቻትሃም ሃውስ ሽልማት በአለም አቀፍ ግንኙነት ላይ በጎ አሻራ ላሳረፉ ግለሰቦች ወይም ተቋማት የሚበረከት ነው፡፡

ለሽልማቱም የተቋሙ የጥናት ቡድን ነፃና ዴሞክራሲያዊ በሆነ መንገድ የተሸላሚዎችን መረጣ እንደሚያካሂድ ነው የተነገረው፡፡

በኤፍሬም ምትኩ

You might also like
Comments
Loading...