Fana: At a Speed of Life!

የዝውውር ዜናዎች እና ጭምጭምታዎች

አዲስ አበባ ፣ ሃምሌ 16 ፣ 2011 (ኤፍ ቢ ሲ) የተለያዩ የአውሮፓ ክለቦች በቀጣዩ የውድድር ዘመን ተጠናክረው ለመቅረብ ተጫዋቾችን እያዘዋወሩ ይገኛል።

እስካሁን ከኤዲን ሃዛርድ እና ማቲያስ ዴሊት ውጭ ትልቅ የተባለ ዝውውር ባይኖርም ክለቦች ራሳቸውን ለማጠናከር እየሞከሩ ነው።

የእንግሊዙ አርሰናል የሪያል ማድሪዱን አማካይ ዳኒ ሴባሎስን በውሰት ውል ለማስፈረም ስለ መስማማቱ የተለያዩ ጋዜጦች ዘግበዋል።

ተጫዋቹ በለንደን ለአንድ አመት እንደሚቆይም ሁለቱን ክለቦች ዋቢ ያደረጉ ዘገባዎች ያመላክታሉ።

የሰሜን ለንደኑ ክለብ ከእሱ በተጨማሪም የ18 አመቱን ተከላካይ ዊሊያም ሳሊባን ከፈረንሳዩ ሴንት ኤቲየን ለማስፈረም ተስማምቷል ነው የተባለው።

ከዚህ ባለፈም አርሰናል ለክሪስታል ፓላሱ ዛሃ 65 ሚሊየን ፓውንድ እና ሬይስ ኔልሰንን በውሰት ውል በተጨማሪነት በመስጠት አዲስ የዝውውር ጥያቄ አቅርቧል።

ይህ የክለቡ ጥያቄ ግን ከክሪስታል ፓላስ በኩል እስካሁን ምላሽ አልተሰጠውም፤ ክለቡ ከዚህ ቀደም ለተጫዋቹ 80 ሚሊየን ፓውንድ ብቻ ትክክለኛ ዋጋው ነው ማለቱ ይታወሳል።

የኢንተር ሚላኑ አጥቂ ማውሮ ኢካርዲ ከአርሰናል ቀርቦለታል የተባለውን የዝውውር ጥያቄ ውድቅ አድርጎታል።

የጁቬንትሱ አጥቂ ፓውሎ ዲያባላ ደግሞ በማንቼስተር ዩናይትድ ተፈላጊ ተጫዋች ሆኗል።

እንደ ደይሊ ሜይል ዘገባ አርጀንቲናዊው ተጫዋች በኦልድትራፎርዱ ክለብ ተፈላጊ ሆኗል፤ የቱሪኑ ክለብም ተጫዋቹን ከ70 እስከ 90 ሚሊየን ፓውንድ ባለው ዋጋ ለመሸጥ ስለማሰቡም ዘገባው ያስረዳል።

ይህ እንዲሆን ግን ማንቼስተር ዩናይትድ ካሉት ትልልቅ ተጫዋቾች አንዱን መሸጥ ይጠበቅበታል ተብሏል።

የስፖርቲንግ ሊዝበኑ የአጥቂ አማካይ ብሩኖ ፈርናንዴዝ ጉዳይም እስካሁን በላንክሻየሩ ክለብ እልባት ያልተሰጠው ጉዳይ ሆኗል።

ተጫዋቹ በእንግሊዝ የመጫዎት ፍላጎቱን ቢገልጽም እስካሁን በሁለቱ ክለቦች መካከል ይፋዊ የዝውውር ሂደት አልተጀመረም።

አሰልጣኝ ኦሊ ጉናር ሶልሻዬር ቡድኑን አጠናክሮ ለመቅረብ ከፈርናንዴዝ በተጨማሪ እንግሊዛዊው ተከላካይ ማጓዬር የዝውውር እቅዱ ስለመሆኑ ቢገልጹም እስካሁን ተጨባጭ የዝውውር ጥያቄ አላቀረቡም።

በበርካታ የእንግሊዝ ክለቦች ሲፈለግ የነበረው የሊዮኑ ነቢል ፈኪር ያልተጠበቀ ዝውውር አድርጓል።

የግራ እግሩ የአጥቂ አማካይ በሊቨርፑልና አርሰናል ሲፈለግ ቢቆይም፥ ወደ ስፔን በማምራት ለሪያል ቤቲስ ፊርማውን አኑሯል።

ለአራት አመታት የሚያቆውን ውልም በ22 ሚሊየን ፓውንድ አጠናቋል።

የስፔኑ አትሌቲኮ ማድሪድ የሪያል ማድሪዱ ሃሜስ ሮድርጌዝ ዝውውር የማይሳካ ከሆነ የቶተንሃም ሆትስፐርሱን ክርስቲያን ኤሪክሰን የማስፈረም ፍላጎት እንዳለው አስታውቋል።

የባየርን ሙኒኩ ዴቪድ አላባ በባቫሪያኑ ክለብ እንደሚቆይ ማረጋገጫ ሰጥቷል፤ ተጫዋቹ በስፔኑ ባርሴሎና ይፈለጋል መባሉን ተከትሎ ነው እንደሚቆይ ማረጋገጫ የሰጠው።

ሃሙስ ኮንትራቱ የሚጠናቀቀው የቶተንሃሙ ቶቢ አልደርዊልድ በክለቡ እንደሚቆይ ማረጋገጫ ሲሰጥ፥ ዴቪድ ዴ ሂያ ቀጣዩ የማንቼስተር ዩናይትድ አምበል የመሆን እድል አለው እየተባለ ነው።

 

 

ስካይ ስፖርት፣ ሚረር፣ ደይሊ ሜይል እና ቢልድ የመረጃዎቹ ምንጮች ናቸው፤

 

 

You might also like
Comments
Loading...