Fana: At a Speed of Life!

የውጭ ጉዳይ ሚኒስትር አቶ ገዱ አንዳርጋቸው ከአውሮፓ ህብረትና ከአውሮፓ ሀገራት አምባሳደሮች ጋር ተወያዩ

አዲስ አበባ፣ ሐምሌ 4፣ 2011 (ኤፍ.ቢ.ሲ) የውጭ ጉዳይ ሚኒስትር አቶ ገዱ አንዳርጋቸው ከአውሮፓ ህብረትና ከ18 የአውሮፓ ሀገራት አምባሳደሮች ጋር ተወያዩ።

ውይይት አምባሳደሮቹ ከውጭ ጉዳይ ሚኒስትሩ ጋር መወያየት እንደሚፈልጉ ባቀረቡት ጥያቄ መሰረት ነው ዛሬ የተካሄደው ያለው።

በኢትዮጵያ የአውሮፓ ህብረት አምባሳደር ዮሃን ቦርግስታም በውይይቱ መክፈቻ ላይ እንዳሉትም፥ ሚኒስትሩ አቶ ገዱ አንዳርጋቸው በአጭር ጊዜ ቀጠሮ ውይይቱን ለማድረግ በመገኘታቸው ምስጋናቸውን አቅርበዋል።

ከሰሞኑ በሀገሪቱ ከፍተኛ አመራሮች ላይ በተፈፀመው ግድያ ማዘናቸውንም በመግለፅ ለኢትዮጵያውያን መፅናናትን እንሚመኙም ነው ያመለከቱት።

አምባሳደሩ የአውሮፓ ህብረት በኢትዮጵያ እየተከናወነ ያለውን የሪፎርም ስራ እንደሚደግፍ በንግግራቸው ጠቁመዋል።

በተለይም እየተወሰደ ባለው የኢኮኖሚ ሪፎርም ህብረቱ ደስተኛ መሆኑን በመጠቆም ይሳካል የሚል እምነት እንዳለው ገልፀዋል።

ይህ የኢኮኖሚ ሪፎርም የተሳካ እንዲሆንም የአውሮፓ ህብረት ለሀገሪቱ እስከ ፈረንጆቹ 2020 ድረስ የሚለቀቅ 1 ነጥብ 4 ቢሊየን ዩሮ ድጋፍ እንደሚያደርግ ነው ያስታወቁት።

የህብረቱ አባል ሀገራት ከኢትዮጵያ ጋር በሚያከናውኗቸው የጋራ ፕሮጀክቶች በየዓመቱ 1 ቢሊየን ዩሮ ፈሰስ እያደረጉ መሆኑን ተናግረዋል።

ይህም ምን ያህል በህብረቱ እና በኢትዮጵያ መካከል የጠነከረ ግኑኝነት እንዳለ የሚያሳይ ነው ያሉት አምባሳደሩ፥ ይህ ግንኙነት እየጎለበተ እንዲሄድም ህብረቱ ፍላጎቱ መሆኑን አመልክተዋል።

አምባሳደሩ አያይዘውም የአውሮፓ ህብረት ልዑክ እና የሀገራቱ ኤምባሲዎች እያገኙት ባለው የኢንተርኔት አገልግሎት ላይ የሚታየው መቆራረጥ በእለት ተእለት ስራዎቻቸው ላይ አሉታዊ ተፅእኖ እያሳደረ በመሆኑ መንግስት መፍትሄ እንዲሰጥም ጥያቄ አቅርበዋል።

አቶ ገዱ አንዳርጋቸው በሀገሪቱ እየተከናወነ ያለውን የኢኮኖሚ ሪፎርም በማንሳት፥ ሀገራቱ ኩባንያዎቻቸው ወደተከፈተው ኢኮኖሚ እንዲገቡ የበኩላቸውን ሚና እንዲጫወቱ ጥሪ አቅርበዋል።

የኢንተርኔት መቆራረጥን በተመለከተ እንደ ሀገር የገጠመ ችግር እንዳይባባስ የተደረገ መሆኑን በማስረዳት፥ ችግሩ በፍጥነት እንዲፈታ ከሚመለተው አካል ጋር መስሪያ ቤታቸው እንደሚሰራ አስታውቅዋል።

ከዚህ በኋላም መሰል ውይይት ከሌሎች ሀገራት አምባሳደሮች ጋር እንደሚቀጥልም ተመልክቷል።

በባሃሩ ይድነቃቸው

You might also like
Comments
Loading...