Fana: At a Speed of Life!

የክረምት በጎ ፈቃድ መርሃ ግብር አካል የሆነው ሆስፒታሎችን የማደስ ስራ ተጀመረ

አዲስ አበባ፣ሐምሌ 2፣ 2011(ኤፍ ቢ ሲ) በተያዘው የክረምት ወቅት የበጎ ፈቃድ አገልግሎት መርሃ ግብር አካል የሆነው ሆስፒታሎችን የማደስ ስራ በዛሬው ዕለት በይፋ ተጀምሯል።

መርሃ ግብሩን የጤና ሚንስትር ዶክተር አሚር አማንና ምክትል ከንቲባ ኢንጅነር ታከለ ኡማ በጥቁር አንበሳ ስፔሻላይዝድ ሆስፒታል በመገኘት አስጀምረዋል።

በማስጀመሪያ መርሃ ግብሩ ላይ ከፍተኛ የመንግስት የስራ ሃላፊዎች፣ የአካባቢው ነዋሪዎችና የተለያዩ ባለሃብቶች ተገኝተዋል።

በተመሳሳይ በጥቁር አንበሳ 2ኛ ደረጃ እና መሰናዶ ትምህርት ቤት የእድሳት ስራ በዛሬው እለት ተጀምሯል።

በመርሃ ግብሩ ተቋማቱን ጽዱና ምቹ ማድረግና በክረምት ወቅት በተቋማቱ ቅጥር ግቢ ውስጥ ችግኝ የመትከል ስራ የሚያካትት መሆኑ ተገልጿል፥

ሆስፒታሎችንና ትምህርት ቤቶችን የማደስ የክረምት ወቅት የበጎ ፈቃድ መርሃ ግብሩም ለሁለት ወራት የሚከናወን መሆኑን ኢንጂነር ታከለ ኡማ ተናግረዋል።

በመርሃ ግብሩ በመዲናዋ የሚገኙ 448 የመንግስት ትምህር ቤቶችንና ሁሉም ሆስፒታሎችን የማደስ ስር የሚከናወን መሆኑ ነው የተገለጸው።

የእዳሳት መርሃ ግብሩ በተሳካ ሁኔታ እንዲጠናቀቅ ሁሉም ማህበረሰብ የበኩሉን ሊወጣ ይገባል ያሉት ምክትል ከንቲባው፥ ባለሃብቶች መርሃ ግብሩን ለመደገፍ ቀናህ ትብብር እያሳዩ መሆኑን አንስተዋል።

በበጎ ፈቀድ መርሃ ግብሩ በአዲስ አበባ የመንግስት ትምህርት ቤቶች ለሚማሩ ተማሪወች ከተለያዩ አካላት 7 ነጥብ 2 ሚሊየን ደብተር ለመሰብሰብ ታቅዶ እስካአሁን 3 ነጥበ 5 ሚሊየን ደብተር መሰብሰብ መቻሉን ገልጸዋል።

የጤና ሚኒስትር ዶክተር አሚር አማን መስሪያ ቤታቸው ለእነዚህ ተማሪዎች የሚሆን አንድ ሚሊየን የመማሪያ ደብተር የሚሰጥ መሆኑን ተናግረዋል።

You might also like
Comments
Loading...