Fana: At a Speed of Life!

የክልል ምስረታ ጥያቄዎች ህግና ሀገራዊ አንድነትን የሚጠብቁ መሆን አለባቸው- ምሁራን

አዲስ አበባ፣ ሐምሌ 2፣ 2011 (ኤፍ.ቢ.ሲ) በየትኛውም የሀገሪቱ ክፍል የሚነሱ የክልል ምስረታ ጥያቄዎች ህግንና ስርዓትን እንዲሁም ሀገራዊ አንድነትን የሚጠብቁ መሆን እንዳለባቸው ምሁራን ተናግረዋል።

የአዲስ አበባ ዩኒቨርሲቲ እና የብሄራዊ ምርጫ ቦርድ በጋራ ያዘጋጁት የክልል ምስረታ ጥያቄ እና ህጋዊ ሂደት ላይ ያተኮረ ውይይት እየተካሄደ ነው።

በውይይቱ ላይ የተለያዩ ጥናታዊ ጽሁፎች ቀርበውም ውይይት እየተደረገባቸው ይገኛል።

በጥናታዊ ጽሁፎቹ ክልሎች እንዴት ሊፈጠሩ ይችላሉ በሚለው ላይ ዓለም አቀፋዊ ተሞክሮዎች በምሳሌነት ተነስተው ውይይት ተደርጎባቸዋል።

በዚህም በበርካታ የዓለም ሀገራት የክልልነት ጥያቄ ሲነሳ ኮሚሽን አቋቁሞ ጥናት በማካሄድ፣ የህገ መንግስት ማሻሻያ በማድረግ እና ህዝበ ውሳኔ በማድረግ ምላሽ እንደሚሰጥ ተመልክቷል።

በውይይቱ ላይ የመነሻ ጽሁፍ ያቀረቡ ምሁራን የክልል ምስረታ ጥያቄ በተናጠል ሊወሰን አይገባም ያሉ ሲሆን፥ ሁሉንም አሳታፊ መሆን እንዳለበት አክለው ገልፀዋል።

ምሁራኑ ከክልልነት ጥያቄ ጋር በተያያዘ በኢፌዴሪ ህገ መንግስት ላይ መሻሻል የሚገባው ነገር እንዳለ አክለው ገልፀዋል።

በተለይም በህገ መንግስቱ አንቀጽ 47 ንጹስ አንቀጽ 3 ላይ ብሄር ብሄረሰቦች በመረጡት ጊዜ ክልል መሆን ይችላሉ በሚለው ላይ ከአተገባበሩ ጋር በተያያዘ ክፍተት እንዳለው አመልክተዋል።

ማንኛውም ብሄር ወይም ብሄረሰብ ብቻውን ያለማንም አጋዠ ክልል የመሆን ጥያቄ ማቅረብ ይችላል የሚለው ጉዳይም አከራካሪ እንደሆነ ተገልጿል።

የክልልነት ጥያቄን ለመመለስ ምን መሟላት አለበት የሚለው ላይም የውይይቱ ተሳታፊዎች የክልል ምክር ቤት ጥያቄውን ከተቀበለ በኋላ መሟላት አለባቸው ያሏቸውን አንስተዋል።

ከእነዚህም ውስጥ በህዝበ ውሳኔው ላይ የሚሳተፈውን ሰው ቁጥር ለማወቅ የህዝብ ቆጠራ ማድረግ እና የምርጫ ቦርድ በቂ ዝግጅት ማድረግ ተጠቃሽ ናቸው ብለዋል።

በፋሲካው ታደሰ

You might also like
Comments
Loading...