Fana: At a Speed of Life!

የኢትዮጵያ የመጠባበቂያ የውጭ ምንዛሬ ክምችት 3 ነጥብ 2 ቢሊየን ዶላር ደርሷል

አዲስ አበባ፣ ሃምሌ 9፣ 2011 (ኤፍ.ቢ.ሲ) የኢትዮጵያ የመጠባበቂያ የውጭ ምንዛሬ ክምችት (ሪዘርቭ) መጠን 3 ነጥብ 2 ቢሊየን የአሜሪካ ዶላር መድረሱ ተገለፀ።

ይህም የሶስት ወራት የሀገሪቱን የገቢ ንግድ ለማከናወን የሚያስችል ነው ብሏል የገንዘብ ሚኒስቴር።

የገንዘብ ሚኒስቴር ሚኒስትር ደኤታ ዶክተር እዮብ ተካልኝ፣ የብሄራዊ ፕላን ኮሚሽን የብሄራዊ ፕላን ኮሚሽን ሀላፊ ሚኒስትር ዶክተር ፍጹም አሰፋ እና የማክሮ ኢኮኖሚ ባለሙያ ዶክተር እዮብ ተስፋዬ በኢትዮጵያ የኢኮኖሚ ሁኔታ ዙሪያ ከፋና ቴሌቪዥን ጋር ቆይታ አድርገዋል።

በቆይታቸውም በሀገሪቱ ማክሮ ኢኮኖሚ ዙሪያ ውይይት አድርገዋል።

የማክሮ ኢኮኖሚ ባለሙያው ዶክተር እዮብ ተስፋዬ በውይይቱ ወቅት፥ በመንግስት ገቢ እና ወጪ፣ በቁጠባ እና ኢንቨስትመንት እንዲሁም በወጪ እና ገቢ ንግድ መካከል ልዩነቱ እየሰፋ ከሄደ ከፍተኛ የማክሮ ኢኮኖሚ ቀውስ እንደሚያስከትል አስታውቀዋል።

የብሄራዊ ፕላን ኮሚሽን ሀላፊ ሚኒስትር ዶክተር ፍጹም አሰፋም፥ ኮሚሽኑ ከማክሮ ኢኮኖሚ አመላካቾች አንፃር አሁንም መዛባቶች እንዳሉ እንደሚያምን አንስተዋል።

ይህም የመጣንበት መንገድ ያመጣው ነው የሚሉት ዶክተር ፍጹም፥ ባለፉት 15 ዓመታት የተመዘገበው እድገት የራሱ ትሩፋቶች እንዲሁም ክፍተቶች እንዳሉበት ይጠቅሳሉ።

በአብዛኛው በመንግስት ኢንቨስትንት የመጣው እድገት የስራ እድል ቢፈጥርም ለድህነት ተኮር ፕሮጀክቶች የተወሰዱ ብድሮች በፍጥነት ስራ ላይ አለመዋል የሀገሪቱን የብድር ጫና ከፍ አንዲል ማድረጉን በማከል።

የገንዘብ ሚኒስቴር ሚኒስትር ዴኤታው ዶክተር እዮብ ተካልኝም፥ ፈጣን የኢኮኖሚ እድገት ማስመዝገብ እና ማስቀጠል ስህተት አይደለም፤ አሁንም እንቀጥልበታለን፤ ነገር ግን አካሄዳችን ከባለፉት አመታት ሊለወጥ ይገባል ብለዋል።

ዶክተር እዮብ ተካልኝ፥ በተለይም ከ2000 ወዲህ ከብድር አወሳሰድ እና ፕሮጀክቶች አፈፃፀም ጋር የተያያዙ ክፍተቶች እንደነበሩ ያነሳሉ።

ከለውጡ ማግስት የሁለተኛው የእድገትና ትራንስፎርሜሽን እቅድ አፈፃፀም መገምገሙን የሚያስታውሱት ሚኒስትር ዴኤታው፥ ግምገማው በእቅዱ የተቀመጡ ግቦች በአግባቡ አለመፈፀማቸውን ማሳየቱን ያስታውሳሉ።

የማክሮ ኢኮኖሚው በመዛባቱ ምክንያትም ቀውስ ውስጥ ሊከት የሚችል ደረጃ ደርሶ ነበር የሚሉት ዶክተር እዮብ፥ አሁን ግን የተለዩትን ችግሮች ማስተካከል በመቻሉ ከችግሩ እየወጣን ነው ብለዋል።

አሁን ላይ ሀገሪቱ ያላት የመጠባበቂያ የውጭ ምንዛሬ ክምችት መጠንም 3 ነጥብ 2 ቢሊየን ዶላር እንደደረሰም ነው ዶክተር እዮብ ያስረዱት።

የሀገር ውስጥ ምርታማነትን በመጨመር የውጭ ምንዛሬ ግኝቱን ማሳደግ ካልተቻለ የማክሮ ኢኮኖሚ መዛባት የሚያመጣቸው ችግሮች ፈታኝ መሆናቸውንም አስታውቀዋል።

የብሄራዊ ፕላን ኮሚሽን ሀላፊ ሚኒስትር ዶክተር ፍጹም አሰፋ በበኩላቸው፥ ከእጅ ወዳፍ የሆነውን ግብርና ለማዘመን እና ምርታማነቱን ለማሳደግም የተለያዩ ስራዎች እየተከናወኑ መሆኑን ይናገራሉ።

የገንዘብ ሚኒስቴርም የማክሮ ኢኮኖሚ መዛባትን ለማስተካከል ለግሉ ሴክተር ተሳትፎ ልዩ ትኩረት መሰጠቱን ነው የሚገልፀው።

የማክሮ ኢኮኖሚ ባለሙያው ዶክተር እዮብ ተስፋዬም፥ ፈጣን እድገቱ የውጭ ምንዛሬ ፣ የወጪ ንግዱ አልያም አጠቃላይ የሀገር ውስጥ ምርት እድገቱ አምጥቶ ህብረተሰቡን በምን ያህል ደረጃ ተጠቃሚ አደረገ፤ ወይንስ ከፍተኛ የውጭ ምንዛሬ እጥረት፣ የዋጋ ግሽበት እና የስራ እድል ችግር አምጥቷል የሚለው ሊፈተሽ ይገባዋል ይላሉ።

ካለፍንበት ሂደትም አሁንም ተምረን የማክሮ ኢኮኖሚ መዛባትን ለመቀነስ የተቋማትን አቅም ማሳደግ አለብንም ነው ያሉት።

በፋሲካው ታደሰ

You might also like
Comments
Loading...