Fana: At a Speed of Life!

የትግራይ ክልል ም/ርእስ መስተዳድር ዶ/ር ደብረፅዮን በአረንጓዴ አሻራ ዘመቻ በእንደርታ ወረዳ ችግኝ ተከሉ

አዲስ አበባ ፣ ሃምሌ 22 ፣ 2011 (ኤፍ ቢ ሲ) የትግራይ ክልል ምክትል ርእስ መስተዳድር ዶክተር ደብረፅዮን ገብረሚካኤል በአረንጓዴ አሻራ ዘመቻ በእንደርታ ወረዳ እንዳባሸለማ በሚባል ስፍራ ችግኝ ተከሉ።

በችግኝ ተከላ ዘመቻው የክልሉ ከፍተኛ የስራ ሀላፊዎች፣ የመከላከያ ሰራዊት አባላት እና የአከባቢው ነዋሪዎች ተሳትፈዋል።

ዶክተር ደብረፅዮን ገብረሚካኤል በችግኝ ተከላው ላይ ባሰሙት ንግግር፥ የችግኝ ተከላ ከትጥቅ ትግሉ ጀምሮ የክልል ህዝብ ሲያከናውን መቆየቱን አስታውስዋል።

ዛሬም በሀገር ደረጃ የተያዘውን የአረንጓዴ አሻራ ቀን እቅድ መሰረት በማድረግ በክልሉ የችግኝ ተከላ ስነ ስርዓት እየተፈፀመ መሆኑን ገልፀዋል።

በዚህ የአረንጓዴ ልማት ስትራቴጂ ታቅዶ በሚደረገው እንቅስቃሴም በትግራይ ክልል በዛሬ ቀን ብቻ 12 ሚሊየን ችግኞች እንደሚተከሉ ነው ዶክተር ደብረ ፅዮን የተናገሩት።

በሀገርም ይሁን በክልል የተያዘው ችግኝ የመትከል ዘመቻ በዓለም አቀፍ ደረጃ ክብረ ወሰንን ማስመዝገብ ብቻ ሳይሆን፥ የተፈጥሮ ሀብትን ለማዳንና  የግብርና ምርታችንን ለማሳደግ አላማ በማድረግ የሚፈፀም መሆኑንም ተናግረዋል።

ህዝቡ በመትከሉ ዘመቻ ያሳየውን መነሳሳት ያደነቁት ዶክተር ደብረፅዮን ገብረሚካኤል፥ የተተከለው ችግኝ እንዲፀድቅ እና የሚፈለገውን ውጤት እንዲያስገኝ ክትትል እና ክብካቤ እንዲያደርግ ጥሪ አቅርበዋል።

በሀገሪቱ 4 ቢሊየን ችግኞችን በዚህ ክረምት ለመትከል እቅድ የተያዘ ሲሆን፥ በትግራይ ክልል በ80 ሚሊየን ችግኞችን ለመትከል ታቅዷል።

 

በሙሉጌታ ታደለ

You might also like
Comments
Loading...