Fana: At a Speed of Life!

ከ115 ሀገራት 1 ሺህ 444 የተለያዩ ጋዜጦችን ያሰባሰበው ግለሰብ የዓለም ክብረ ወሰን ባለቤት ሆኗል

አዲስ አበባ፣ ሰኔ 26፣ 2011 (ኤፍ.ቢ.ሲ) ጣሊያናዊው ወጣት የ10 ዓመት ታዳጊ እያለ ማሰባሰብ የጀመረው ጋዜጣ አሁን ላይ የዓለም ክብረ ወሰን ባለቤት እድርጎታል።

ሰርጂዮ ቦዲኒ የተባለው ጣሊያናዊ ግለሰብ የተለያየ ርእስ ያላቸውን 1 ሺህ 444 ጋዜጦችን በማሰባሰቡ ነው የዓለም ድንቃድንቅ እና ክብረ ወሰኖች መዝገብ ላይ ስሙ ሊሰፍር የቻለው።

ሰርጂዮ ቦዲኒ ጋዜጦቹን ከ115 የተለያዩ የዓለም ሀገራት ማሰባሰቡ ደግሞ በርካቶችን እንዳስደነቀ ነው የተነገረው።

የ10 ዓመት ልጅ እያለ ጋዜጣ መሰብሰብ መጀመሩን የተናገረው ሰርጂዮ ቦዲኒ፥ ጋዜጦቹ እንዳይበላሹበትም በፕላስቲክ ሳጥን ውስጥ እንደሚያስቀምጣቸውም ተናግሯል።

ጋዜጣ መሰብሰብ የጀመረውም ተማሪ እያለ በተሰጣቸው የቤት ስራ አማካኝነት እንደሆነ እና ስለ ጋዜጣም ይሁን ስለ ጋዜጠኝነት ያኔ እንዳወቀ ከዚህም የተነሳ ጋዜጠኝነትን በጣም ይወድ እንደነበረም ተናግሯል።

“ህልሜ የስፖርት ጋዜጠኛ መሆን ነበር” ያለው ሰርጂዮ ቦዲኒ፥ እንደ አጋጣሚ ሆኖ በኬሚስትነት ሙያ መሰማራቱን ነው የተናገረው።

ምንጭ፦  www.upi.com/Odd_News

You might also like
Comments
Loading...