Fana: At a Speed of Life!

አሜሪካ ለታይዋን የ2 ነጥብ 2 ቢሊየን ዶላር የጦር መሳሪያ ሽያጭ አጸደቀች

አዲስ አበባ፣ሐምሌ 2፣ 2011(ኤፍ ቢ ሲ)  አሜሪካ ቻይና ሉዓላዊ ግዛቴ ነው ለምትላት ታይዋን የ2 ነጥብ 2 ቢሊየን ዶላር የጦር መሳሪያ ሽያጭ ውል አጸደቀች።

የአሜሪካ የውጭ ጉዳይ መስሪያ ቤት ለታይን እንደ አስፈላጊነቱ ተግባራዊ የሚደረግ የ 2 ነጥብ 2 ቢሊየን ዶላር የጦር መሳሪያ ሽያጭ ውል ማፅደቁን አስታውቋል።

የፀደቀው የጦር መሳሪያ ሽያጭ ውልም ኤም 1 ኤ2 ቲ የተሰኘ ታንክን ጨምሮ  የተለያዩ  የሚሳኤል መቃወሚያዎች እና ተያያዥ የጦር መሳሪያዎችን የሚያካትት መሆኑ ተገልጿል።

በቅርቡ አሜሪካ ለታይዋን 330 ሚሊየን ዶላር የሚያወጣ የጦር መሳሪያ ሽያጭ ለመፈፀም መወሷናን ተከትሎ  ታይዋን የግዛቴ አንድ አካል ነው የምትለውን ቻይና ያስቆጣ ሲሆን አሜሪካ ውሳኔውን በድጋሜ እንድታጤነው ማስጠንቀቋ ይታወሳል።

ይሁን እንጂ አሜሪካ የቻይናን ማስጠንቀቂያ ወደ ጎን በመተው የጦር መሳሪያ ሽያጭ ውሉን ማፅደቋ ተነግሯል።

የሽያጭ ውሉ መፅደቁን ተከትሎ የታይዋን ፕሬዚዳንት ፅህፈት ቤት ለአሜሪካ መንግስት ከልብ የመነጨ ምስጋና ማቅረቡ ተገልጿል።

የፕሬዚዳንት ፅህፈት ቤቱ ቃል አቀባይ ቱን ሃን፥ የጦር መሳሪያ ግዥው ሀገሪቱ እያከናወነች ላለው የመከላከያ አቅም ግንባታ ስራ ከፍተኛ አስተፅኦ ያለው መሆኑን ተናግረዋል።

ከዚህ ባለፈም ስምምነቱ ሀገራቱ  በጸጥታና በሌሎች ዘርፎች ዙሪያ የሚኖራቸውን ቀጣይ ግንኙነት ለማጠናከር የሚያስችል መሆኑን ጠቁመዋል።

ምንጭ ፦ሬውተርስ

You might also like
Comments
Loading...