Fana: At a Speed of Life!

አሜሪካና ሩሲያ በኒውክሌር ጦር መሳሪያ ምርት ገደብ ዙሪያ ሊወያዩ ነው

አዲስ አበባ፣ ሃምሌ 9፣ 2011 (ኤፍ ቢ ሲ) አሜሪካና ሩሲያ በኒውክሌር የጦር መሳሪያ ምርት ገደብና ቁጥጥር ዙሪያ ሊወያዩ ነው ።

ዋሽንግተንና ሞስኮ በአሁኑ ወቅት አሳሳቢ በሆነው የኒውክሌር ጦር መሳሪያ ምርት ገደብና ቁጥጥር  ዙሪያ በነገው ዕለት በስዊዘርላንድ ጀኔቫ የሚመክሩ መሆኑን የአሜሪካ ባለስልጣናት አስታውቀዋል።

ለውይይቱም ከሁለቱ ሀገራት የተውጣጡ ከፍተኛ የመንግስት ተወካዮች ወደ ስፍራው የሚያቀኑ መሆኑ ተገልጿል።

በውይይቱ የሚሳተፉ የአሜሪካ ተወካዮች በምክትል የውጭ ጉዳይ ሚኒስትር ጆን ሱሊቫን የሚመሩ ሲሆን፥ የሩሲያ ተወካዮች ደግሞ በሀገሪቱ ምክትል የውጭ ጉዳይ ሚኒስትር ሰርጂያ ርያብኮቭ የሚመሩ ይሆናል።

በምክክር መድረኩ ቻይና ልትሳተፍ እንደምትችል የተጠቆመ ሲሆን፥ በዚህም የኒውክሌር ጦር መሳሪያ ምርት ገደብን ለመቆጣጠር የሚያስችሉ አዳዲስ ሃሳቦች ይነሳሉ ተብሎ ይጠበቃል።

ኢራን በቅርቡ በፈረንጆቹ 2015 ላይ ከተቀመጠው የኒውክሌር ስምምነት ገደብ በላይ ማምረት መጀመሯን ተከትሎ አሜሪካ ጉዳዩን በድጋሜ እንድታጤነው ጠይቃለች።

ኢራን በበኩሏ አሜሪካ የጣለችባትን ማዕቀብ የምታነሳላት ከሆነ በየትኛውም ጊዜና ሁኔታ በጉዳዩ ዙሪያ ለመወያየት ዝግጁ መሆኗን  ገልፃለች።

የአውሮፓ ህብረት የውጭ ጉዳይ ሚኒስትሮች ጉዳዩን አስመልክተው ባካሄዱት ስበሳባ ቴህራን ከኒውክሌር ስምምነቱ እንዳትወጣ ለማድረግ ችግሩን በድርድር ለመፍታት መስማማታቸውን አስታውቀዋል።

የአሜሪካው ፕሬዚዳንት ዶናልድ ትራምፕ በቅርቡ በተካሄደው የቡድን 20 ሀገራት ስብስባ ወቅት የአለም ስጋት እየሆነ በመጣውን የኒውክሌር የጦር መሳሪያ ምርት ዙሪያ ከቻይናና ሩሲያ አቻቸው ጋር መምከራቸው ተነግሯል።

ምንጭ ፦ሬውተርስ

You might also like
Comments
Loading...