Fana: At a Speed of Life!

ብሄራዊ የመረጃና ደህንነት አገልግሎት አመራሮችና ሰራተኞች ከጎዳና ተዳዳሪዎች ጋር በመሆን ችግኝ ተከሉ

አዲስ አበባ፣ ሃምሌ 22፣ 2011 (ኤፍ ቢ ሲ) ብሄራዊ የመረጃና ደህንነት አገልግሎት አመራሮችና ሰራተኞች በአረንጓዴ አሻራ ቀን ከአንድ ሺH የጎዳና ተዳዳሪዎች ጋር በመሆን ችግኝ ተከሉ።

በኮተቤ አካባቢ በተካሄደው የችግኝ ተከላ መርሃ ግብር ላይ የተሳተፉት የአገልግሎቱ ዋና ዳይሬክተር ጀነራል ኮሚሽነር ደመላሽ ገብረሚካኤል እንዳሉት፥ በጠቅላይ ሚኒስትር ዶክተር ዐቢይ አህመድ አነሳሽነት የአረንጓዴ አሻራ ተብሎ በተሰየመው ቀን በመላ አገሪቱ 200 ሚሊዮን ችግኞችን ለመትከል መታቀዱን አንስተዋል።

ችግኞችና ታዳጊዎች ክብካቤ የሚሹ በመሆናቸው ይመሳሰላሉ በማለትም ገልፀዋል።

ዛሬ በተካሄደው የችግኝ ተከላ መርሃ ግብር ላይ የተሳተፉት ታዳጊዎች ነገ የተሻለ ቦታ ደርሰው የድርሻቸውን እንዲያበረክቱ፣ የሃገርን ሰላምና ደህንነት የሚጠብቁ ዜጎች እንዲሆኑ ብሄራዊ የመረጃና ደህንነት አገልግሎት የበኩሉን ሃላፊነት ይወጣል፤ ለዚህም ትምህርት ያቋረጡ እንዲጀምሩ፣ በመማር ላይ ያሉም በርትተው እንዲማሩ አገልግሎቱ ተመሳሳይ እገዛዎችን ያደርጋል ብለዋል።

በችግኝ ተከላ መርሃ ግብሩ ላይ ከተሳተፉት የጎዳና ተዳዳሪዎች መካከል ታዳጊ  ዳንኤል ብርሃኑ እንደዜጋ ለሀገሩ አንድ አሻራ ማሳረፍ በመቻሉ እጅግ ደስተኛ መሆኑን ተናግሯል። በአሁኑ ወቅት ፒያሳ አካባቢ በሚገኝ ማዕከል ሙያዊ ስልጠና እየወሰደ ሲሆን፥ በሚያገኘው ስልጠና ሰርቶ ውጤታማ ዜጋ ለመሆን ጥረት እያደረገ መሆኑንም የገለፀ ሲሆን፥ ሌሎችም ይሄንኑ ተሞክሮ እንዲቀስሙ አሳስቧዋል።

You might also like
Comments
Loading...