Fana: At a Speed of Life!

በኢንቨስትመንት ዘርፉ የሚስተዋሉ ችግሮችን ለመፍታት የሚያስችል የኢንቨስትመንት አዋጅ ማሻሻያ እየተደረገ ነው

አዲስ አበባ፣ ሰኔ 27፣ 2011 (ኤፍ.ቢ.ሲ) በኢንቨስትመንት ዘርፉ ላይየ የሚስተዋሉ ችግሮችን ለመፍታት የሚያስችል የኢንቨስትመንት አዋጅ ማሻሻያ እያደረገ መሆኑን የኢንቨስትመንት ኮሚሽን ገለጸ።

የኢንቨስትመንት ኮሚሽን በማሻሻያ ረቂቅ አዋጁ ዙሪያ በዛሬው ዕለት ከመንግስት ባለድርሻ አካላት ጋር ተወያይቷል።

የኢትዮጵያ የኢንቨስትመንት ዘርፍ ምንም እንኳን ከቅርብ አመታት ወዲህ እያደገ እና እየሰፋ ቢመጣም አሁንም ሙሉ ለሙሉ ከችግሮች የጸዳ አይደለም።

ዘርፉ ከህግ ከአሰራርም ጋር የተያያዙ በርካታ ክፍተቶች እንዳሉበት ይነገራል፤ በተግባር የሚስተዋለውም ይሄው ነው።

የኢንቨስትመንት ኮሚሽነሩ አበበ አበባየው እንደሚሉት፥ ዘርፉ ያሉበትን ክፍተቶች ለመድፈን የሚያስችል የኢንቨስትመንት አዋጅ ማሻሻያ እየተደረገ ሲሆን፥ለዚህ ስራም ከአራት ወራት በፊት በተቋቋመ ግብረ ሃይል ሰፊ ስራ ሲሰራ ቆይቷል።

እንደ ኮሚሽነሩ ገለፃ አንደ ሀገር በተለይ ለኢኮኖሚው መጎልበት ከፍተኛ አስተዋጽኦ ያለውን የኢንቨስትመንት ዘርፉን ማሳደግ ያስፈልጋል።

ለዚህ ደግሞ በኢንቨስትመንቱ ሰፊ ስራ ለመስራት በሚያስችል መልኩ ህጉን ማስተካከል ቀደሚ ስራ ሊሆን ይገባል ነው ያሉት።

ይህም በተለይ የግል ዘርፉን ተሳትፎ፣ የውጭ የቀጥታ ኢንቨስተመንትን እና የውጭ እና የሀገር ውስጥ ኢንቨስተሮች ትስስርን በማጠናከር ለወጣቶች ሰፊ የስራ እድል መፍጠር እና የቴክኖሎጂ ሽግግሩን ለማጠናከር ያለው አስተዋጽኦ ከፍተኛ ነው።

በአሁኑ ወቅትም ኮሚሽኑ ከአራት ወራት በፊት ተቋቁሞ ስራ በጀመረው ግብረ ሃይል አማካኝነት አለም አቀፍ ልምድን እና አሰራርን መሰረት ባደረገ መልኩ ግብዓቶችን የመሰብሰብ እና ረቂቁን የማዘጋጀት ስራ ሲሰራ መቆየቱን ጠቁመዋል።

በዚሁ ረቂቅ ጉዳይ ዙሪያም ኮሚሽኑ ከሚለከታቸው ባለድርሻ አከላት ጋር በዛሬው ዕለት ተወያይቷል።

ማሻሻያው ዘርፉን ከመረጃ አያያዝ ጀምሮ እሰከ ኢንቨስትመንት ጥበቃ ድረስ ሰፊ ለውጥ ያመጣል ተብሎ ይጠበቃል።

ኮሚሽነር አበበ እንዳሉት ተቋሙ የህግ ማሻሻየውን መጠናቀቅ ሳይጠብቅ በተለይም አሰራሩን ዘመናዊ እና ፈጣን ከማድረግ ጋር የተያያዙ የአሰራር ማሸሻያዎች በማድረግ ላይ ስለመሆኑም ነው ለጣቢያችን የገለጹት።

ዛሬ በተደረገው እና በቀጣይመ በሚደረገው ውይይትም ተጨማሪ ማሻሻያዎች እና ግብዓቶች ተሰብስበው፥አዋጁ በአዲሱ ዓመት የመጀመሪያ ሩብ አመት ላይ ቅድሚያ ከሚሰጣቸው ህግች ተመድቦ በህዝብ ተወካዮች ምክር ቤት ይጸድቃል ተብሎ ይጠበቃል።

በትእግሰት አብርሃም

You might also like
Comments
Loading...