Fana: At a Speed of Life!

በሲንጋፖር ለገበያ ሊቀርብ የነበረ 8 ነጥብ 8 ቶን መጠን ያለው የዝሆን ጥርስ ተያዘ

አዲስ አበባ ፣ ሃምሌ 16 ፣ 2011 (ኤፍ ቢ ሲ) ሲንጋፖር በህገ ወጥ መንገድ ለገበያ ሊቀርብ የነበረን 8 ነጥብ 8 ቶን መጠን ያለው የዝሆን ጥርስ መያዟን አስታወቀች።

የሃገሪቱ ጉምሩክ፣ ስደተኞችና የድንበር ቁጥጥር ባለስልጣን እንዳስታወቀው፥ የዝሆን ጥርሱ መነሻውን ከዴሞክራቲክ ሪፐብሊክ ኦፍ ኮንጎ በማድረግ ወደ ቬትናም የሚያቀና ነበር።

ከአንድ ቀን በፊት የተያዘው የዝሆን ጥርስ 300 ከሚጠጉ ዝሆኖች የተወሰደና 12 ነጥብ 9 ሚሊየን ዶላር ዋጋ ያለው ነው ተብሏል።

ከዝሆን ጥርሱ በተጨማሪም ፓንጎሊን የተሰኘውና ስጋው ለምግብነት የሚውል የዱር እንስሳ አብሮ መያዙንም ነው ባለስልጣኑ ያስታወቀው።

በዚህም 11 ነጥብ 9 ቶን መጠን ያለው የፓንጎሊን ስጋን ወደ ቬትናም እና ቻይና ሊገባ ሲል ተይዟል ነው ያለው።

ይህም በገንዘብ 35 ነጥብ 7 ሚሊየን ዶላር ዋጋ ያለው ሲሆን፥ መጠኑ ከ2 ሺህ ፓንጎሊኖች የሚገኝ መሆኑንም ገልጿል።

እስካሁንም ካለፈው ሚያዚያ ወር ጀምሮ ሲንጋፖር 35 ነጥብ 7 ቶን መጠን ያለው የፓንጎሊን ስጋ ድንበሯን ተሻግሮ ወደ ቻይና እና ቬትናም ሊገባ ሲል መያዟን አስታውቃለች።

ህገ ወጥ የዝሆን ጥርስና የአውራሪስ ቀንድ ንግድ በእስያ ሃገራት በከፍተኛ ደረጃ ይዘወተራል።

ባለፈው መጋቢት ወር ላይ 9 ነጥብ 1 ቶን መጠን ያለው የዝሆን ጥር የተያዘ ሲሆን፥ በአካባቢው በሚገኙ ሃገራትም በርካታ መጠን ያለው የአውራሪስ ቀንድ ገበያ ላይ ተይዟል።

ህገ ወጥ ንግዱ ለአፍሪካ ዝሆኖች እና አውራሪስ ቁጥር መመናመን ከፍተኛ ድርሻ እንዳለው ይነገራል።

 

 

ምንጭ፦ ሬውተርስ

You might also like
Comments
Loading...