Fana: At a Speed of Life!

በመዲናዋ የበጎ ፈቃድ አገልግሎት በበጋ ወራት እንዲቀጥል የሚያስችል አሰራር ተዘረጋ

አዲስ አበባ፣ሐምሌ 4፣2011 (ኤፍ.ቢ.ሲ) የበጎ ፈቃድ አገልግሎትን በአዲስ አበባ በበጋ ወራት እንዲቀጥል ለማድረግ የሚያስችል አሰራር መዘርጋቱ ተገለፀ።

የአዲስ አበባ ባህል ኪነ-ጥበብ እና ቱሪዝም ቢሮ ሃላፊ ረዳት ፕሮፌሰር ነብዩ ባዬ ከፋና ብሮድካስቲንግ ኮርፖሬት ጋር ባደረጉት ቆይታ፥ በመዲናዋ የሚከናወነውን የበጎ ፈቃድ አገልግሎት በበጋ ወራት ለማስቀጠል  የሚያስችል ቢሮ መቋቋሙን ገልፀዋል።

ከጣቢያችን ጋር ቆይታ ያደረጉ ወጣቶች በበኩላቸው፥የበጎ ፈቃድ አገልግሎት ቀጣይነት ሊኖረው እንደሚገባና የበጎ ፈቃድ አገልግሎት መስጠት ለሀገራችን እድገትም ወሳኝ መሆኑን ተናግረዋል።

በጎ ፈቃድ በሁሉም የእምነት አስተምህሮቶች ተቀባይነት ያለው ልባዊ የሆነ ሀሳብ እሙን ነው።

በጎ ማድረግ አንድነትን፣ ቀና መሆንን፣ መረዳዳትን፣ መደጋገፍን የሚያሳይ እና ሁሉም እነዚህን እና መሰል ቀናዊ ሀሳቦችን ይዞ የሚተገብረው እና ሊተገብረው የሚገባ መሆኑም በተለያዩ አካላት ይነገራል።

ከጣቢያችን ጋር ቆይታ ያደረጉት እና በበጎ ፈቃድ አገልግሎት ከዚህ ቀደም ሲሳተፉ የነበሩ እንዲሁም በጎነት ስቧቸው አገልግሎቱን ለመስጠት ገና የሚቀላቀሉ ወጣቶችም ስለ በጎነት ሲናገሩ የደስታ ስሜታቸውን ማንበብ የሚከብድ አይደለም።

የበጎ ፈቃድ አገልግሎት ከክረምቱ ባሻገር በበጋውም ተጠናክሮ ሊቀጥል እንደሚገባውም ወጣቶች ተናግረዋል።

በአዲስ አበባ በተለያዩ የበጎ ፈቃድ ተግባራት ላይ በመሳተፍ ላይ የሚገኙት ወጣቶች እንደሚሉት የዚህ ተግባር ተጠናክሮ መቀጠል ለሃገር እድገትም የሚኖረው አስተዋጽኦ ከፍ ያለ ነው።

የሀገር እድገት ሲታሰብም መሰረቱ በጎነት ነው የሚሉት ወጣቶቹ ሀገርን ለማሳደግ ደግሞ የሁሉም ሀላፊነት ሊሆን እንደሚገባ እና ሁሉም በበጎነት በጎ ማድረግ ላይ ሊሳተፍ እንደሚገባም በአፅንኦት ይናገራሉ።

የአዲስ አበባ ባህል ኪነጥበብ እና ቱሪዝም ቢሮ ሀላፊ ረዳት ፕሮፌሰር ነብዩ ባየ ከጣቢያችን ጋር ባደረጉት ቆይታ የነገሩንም በጎ ፈቃድን የማይቋረጥ እንዲሆን ለማድረግ የሚያስችል አሰራር መዘርጋቱን ነው።

ሀላፊው እንዳሉትም አገልግሎቱን በሀላፊነት የሚከታተል እና የሚቆጣጠር ቢሮ ተቋቁሟል።

ተጠሪነቱ ለከተማ አስተዳደሩ ምክር ቤት እና ለከንቲባው የሆነው የወጣቶች እና የበጎ ስራ ማስተባበሪያ ቢሮ የሚል ሰያሜ የተሰጠው ተቋሙ በብዙ መስሪያ ቤቶች ድጋፍ እንደሚደረግለትም ሀላፊው ተናግረዋል።

ይህ መሆኑ ደግሞ አመቱን ሙሉ በጎ ፈቃድ አገልግሎት ተጠናክሮ እንዲቀጥል እና ድጋፍ የሚሹትንም በዘላቂነት ለመደገፍ ያስችላል ተብሏል።

በጎ በማድረግም ማህበራዊ ትስስራችን ማጠናከር ይገባል የሚሉት ረዳት ፕሮፈሰር ነብዩ ባየ ከዚህ በኋላ አመቱን በሙሉ ሁሉም ህበረተሰብ ድጋፍ ለሚያስፈልጋቸው ሰዎች የቻለውን ድጋፍ እንዲያደርግ ጥሪ አቅበዋል።

በዙፋብ ካሳሁን

 

You might also like
Comments
Loading...