Fana: At a Speed of Life!

በሀገር አቀፍ ደረጃ ለሚካሄደው የችግኝ ተከላ እና የጽዳት ዘመቻ በኦሮሚያ ክልል አስፈላጊው ዝግጅት መጠናቀቁ ተገለጸ

አዲስ አበባ፣ ሃምሌ 5፣ 201 (ኤፍ.ቢ.ሲ) የኦሮሚያ ክልል በሀገር አቀፍ ደረጃ ለሚካሄደው የችግኝ ተከላ እና የጽዳት ዘመቻ አስፈላጊው ዝግጅት መጠናቀቁን አስታወቀ፡፡

የክልሉ የኮሙዩኒኬሽን ቢሮ ሃላፊ አቶ አድማሱ ዳምጠው የችግኝ ተከላ እና የጽዳት ዘመቻ ዝግጅቱን በተመለከተ መግለጫ ሰጥተዋል፡፡

በመግለጫው በክልሉ 1 ነጥብ 9 ቢሊየን ችግኞችን ለመትከል ዝግጅት እየተደረገ መሆኑን ጠቅሰው፥ እስካሁን 4 ሚሊየን ሰዎችን በማሳተፍ 900 ሚሊየን ችግኝ መተከሉን ገልፀዋል።

በሀገር አቀፍ ደረጃ ሃምሌ 22 ቀን 200 ሚሊየን ችግኝ ለመትከል የተያዘውን እቅድ ስኬታማ ለማድረግ ከእቅድ በላይ ጉድጓዶች መዘጋጀታቸውንም ሃላፊው ተናግረዋል፡፡

በየወሩ እየተካሄደ በሚገኘው የጽዳት ዘመቻ ክልሉ በንቃት እየተሳተፈ መሆኑን የገለጹት አቶ አድማሱ ባለፉት ሁለት ዙሮች የክልሉ ህዝብ ውጤታማ ስራ ሰርቷል ብለዋል፤
በቀጣይ እሁድ በሚካሄደው ሶስተኛው ዙር የጽዳት ዘመቻም በተለየ መልኩ በኦሮሚያ ክልል እና በአዲስ አበባ በሚገኙ የክልሉ መስሪያ ቤቶች የፅዳት ዘመቻው ይደረጋል ብለዋል።

ሃላፊው ባለፉት ቀናት በክልሉ በተካሄደው ህዝባዊ ውይይት ከህብረተሰቡ ጋር በቅንጅት ለመስራት የጋራ መግባባት ላይ መደረሱን አንስተዋል፡፡

በውይይቱ የሰላም እና ፀጥታ ጉዳዮች እንዲሁም የክልሉ የልማት እንቅስቃሴ ዋነኛ የመነጋገሪያ አጀንዳዎች እንደነበሩ አቶ አድማሱ ገልፀዋል፡፡

በተለይም ሰላምን ማረጋገጥ እና ህገወጥ ተግባራትን የማጋለጡ ስራ ከመንግስት በተጨማሪ የሁሉም የህብረተሰብ ክፍል አስተዋጽኦ ወሳኝ መሆኑን መግባባት ላይ ተደርሷል ነው ያሉት።

የተጀመረውን ለውጥ የሚያግዙና መጭውን ትውልድ ተጠቃሚ የሚያደርጉ ስራዎችን በእውቀት እና በቴክኖሎጂ ተደግፎ ለመስራት እንዲሁም ከግብ ለማድረስ ከመግባባት ላይ በመድረስ ውይይቱ መጠናቀቁንም ጠቅሰዋል።

በትዕግስት አብርሃም

You might also like
Comments
Loading...