Fana: At a Speed of Life!

መቐለ እና ባህር ዳር ዩኒቨርሲቲዎች በተለያዩ የትምህርት መስኮች ያስለጠኗቸውን ተማሪዎች አስመረቁ

አዲስ አበባ፣ ሃምሌ 13፣2011 (ኤፍ.ሲ.ቢ) መቐለ እና ባህር ዳር ዩኒቨርሲቲዎች በተለያዩ የትምህርት መስኮች በመጀመሪያ ሁለተኛ እና ሶስተኛ ዲግሪ ያስለጠኗቸውን ተማሪዎች አስመረቁ፡፡

በመቐሌ ዩኒቨርሲቲ 7ሺህ 475፣ በባህር ዳር ዩኒቨርሲቲ 9ሺህ 750 ተማሪዎች ናቸው በዛሬው ዕለት የተመረቁት፡፡

ባህርዳር ዩኒቭርሲቲ ለሶስት ሰዎች የክብር ዶክትሬት ሰጥቷል፡፡

ዶክተር ሰገነት ቀለሙ፣ ፕሮፌሰር ሃንስ ማትሰን እና ማርክ ጌልፋንድ ናቸው በባህርዳር የኒቨርሲቲበዛሬው ዕለት የክብር ዶክትሬታቸውን ያገኙት፡፡

ዶክተር ሰገነት ቀለሙ በልዩ መሪነትና ተመራማሪነት ዘርፍ የተመረጡ ሲሆን ናይሮቢ የሚገኘው ዓለማቀፉ የነፍሳት ግብረ አካል እና ሥነ-ምኅዳር የመጀመሪያዋ ሴት ዋና ሥራ አስፈጻሚ ናቸው፡፡

ከ25 ዓመታት በላይ በሰሜን አሜሪካና በላቲን አሜሪካ በርካታ ምርምሮችን ሠርተዋል፡፡

በዓለማቀፍ ደረጃ ዕፅዋትን በሚያጠፉ በሽታዎች ላይ ሳይንሳዊ ምርምር በማድረግ ቀዳሚ ሴት ተመራማሪ በመሆናቸውም በርካታ ሽልማቶችን አሸንፈዋል፡፡

ስዊድናዊው ፕሮፌሰር ሃንስ ማትሰን በባሕር ዳር ዩኒቨርሲቲና በምሥራቅ አፍሪካ የመሬት አስተዳደር ዘርፍ ከፍተኛ አስተዋጽኦ አበርክተዋል፡፡

አሜሪካዊው ማርክ ጌልፋንድ በበኩላቸው በኢትዮጵያና በሌሎች ታዳጊ ሀገራት የሳይንስ፣ የቴክኖሎጂ፣ የምሕንድስና እና የሒሳብ ትምህርቶች ልዩ ትኩረት እንዲሰጣቸው ድጋፍ ያደረጉ ምሁር ናቸው፡፡

በባሕር ዳር፣ በጎንደር፣ በአዲስ አበባና በሌሎችም 12 ዩኒቨርሲቲዎችና አካባቢዎች የስቲም ማዕከላት እንዲከፈቱ ድጋፍ አድርገዋል፡፡

በተያያዘ የኦሮሚያ ስቴት ዩኒቨርሲቲ የገዳ ስርአትን በማስተዋወቅ ረገድ ሰፊ ስራ ለሰሩት ፕሮፌሰር አስመሮም ለገሰ እና ሌሎች ሁለት ግለሰቦች እውቅና ሰጥቷል።

ዩኒቨርሲቲው በዛሬው እለት በመጀመሪያ እና ሁለተኛ ዲግሪ 5 ሺህ 228 ተማሪዎችን በባቱ ሲያስመርቅ ነው ለበጎ ተግባራቸው እውቅና የሰጠው።

You might also like
Comments
Loading...