Fana: At a Speed of Life!

ሆንግ ኮንግ በወንጀል የተጠረጠሩ ሰዎችን ለቻይና አሳልፎ መስጠት የሚያስችለው ረቂቅ ውድቅ መሆኑን አስታወቀች

አዲስ አበባ ፣ ሃምሌ 2 ፣ 2011 (ኤፍ ቢ ሲ) ሆንግ ኮንግ በወንጀል የተጠረጠሩ ሰዎችን ለቻይና አሳልፎ መስጠት የሚያስችለው ረቂቅ ውድቅ መሆኑን አስታወቀች።

የሆንግ ኮንግ አስተዳደር መሪ ካሪ ላም በወንጀል የተጠረጠሩ ሰዎችን ለቻይና አሳልፎ መስጠት የሚያስችለው እቅድ አብቅቶለታል ብለዋል።

ሆንግ ኮንግ ከወር በፊት በወንጀል የተጠረጠሩ ሰዎችን ለቻይና አሳልፎ መስጠት የሚያስችለውን እቅድ ለማጽደቅ እንቅስቃሴ መጀመሯ ይታወሳል።

ይህን ተከትሎም በርካቶች ረቂቁ አግባብ ያልሆነና ህግን የተጻረረ ነው በሚል ተቃውሞ አደባባይ ወጥተዋል።

ከዚያን ጊዜ ወዲህም የሆንግ ኮንግ አስተዳደር ረቂቁን ለጊዜውም ቢሆን ማገዱን መግለጹም የሚታወስ ነው።

በዛሬው እለትም ካሪ ላም ረቂቁ ሙሉ በሙሉ እንዳበቃለት ገልጸዋል፤ እርሳቸው ይህን ይበሉ እንጅ በርካቶች ግን በንግግራቸው እምነት እንደሌላቸው እየገለጹ ነው።

ህግ አውጭዎችና የተቃውሞ አስተባባሪዎች መሪዋ የቃላት ጨዋታውን አቁመው የህዝቡን ትክክለኛ ፍላጎት ማድመጥና ተገቢውን ምላሽ መስጠት ይገባቸዋል እያሉ ነው።

ያ የማይሆን ከሆነ ግን ረቂቁ ብቻ ሳይሆን የእርሳቸው አስተዳደር የማብቂያ ጊዜም ይሆናል ነው ያሉት።

የቀድሞዋ የብሪታንያ ቅኝ ግዛት ሆንግ ኮንግ ከፈረንጆቹ 19 97 ጀምሮ በቻይና ስር መተዳደር ጀምራለች።

ቤጂንግ ለሆንግ ኮንግ ራስ ገዝና ልዩ አስተዳደር ነጻነት እሰጣለሁ በሚል በአንድ ሃገር ሁለት አስተዳደር ስርዓት እያስተዳደረቻት ይገኛል።

ይሁን እንጅ ከቅርብ ጊዜ ወዲህ ቤጂንግ ቃሏን አላካበረችም በሚል እና የቻይና መንግስት በሆንግ ጉዳይ የበዛ ስልጣን በመጠቀም ጣልቃ ገብነቱ አይሏል በሚል በሆንግ ኮንግ ነዋሪዎችና በቻይና መካከል ልዩነቶች እየተንጸባረቁ ነው።

ይህን ተከትሎም ሆንግ ኮንግ ነጻ መሆን አለባት የሚል አቋም አላቸው፤ ቻይና በበኩሏ የተቃዋሚዎቹን አካሄድ ህገ ወጥ ነው ትላለች።

 

 

ምንጭ፦ ሬውተርስ

 

You might also like
Comments
Loading...