Fana: At a Speed of Life!

68ኛው የኢጋድ የሚኒስትሮች ምክር ቤት ስብሰባ ነገ በአዲስ አበባ ይካሔዳል

አዲስ አበባ ፣ ሰኔ 11 ፣ 2011 (ኤፍ ቢ ሲ) 68ኛው የምስራቅ አፍሪካ የልማት በይነ መንግስታት ድርጅት (ኢጋድ) የሚኒስትሮች ምክር ቤት ስብሰባ ነገ በአዲስ አበባ ይካሔዳል።

የውጭ ጉዳይ ሚኒስቴር ቃል አቀባይ አቶ ነቢያት ጌታቸው ዛሬ በተለያዩ ጉዳዮች ላይ ጋዜጣዊ መግለጫ ሰጥተዋል።

በመግለጫቸውም ስብሰባው በዋናነት በሱዳን እና ደቡብ ሱዳን ወቅታዊ ሁኔታዎች ላይ ትኩረቱን እንደሚያደርግ አንስተዋል።

በሱዳን ወቅታዊ ሁኔታ ላይ በኢጋድ ሊቀ መንበር አማካኝነት ሪፖርት ቀርቦ ውይይት ይደረግበታልም ነው ያሉት።

በደቡብ ሱዳን ላይም በጁባ በተካሄደውና በ67ኛው የሚኒስትሮች ስብሰባ የደቡብ ሱዳን የቅድመ ሽግግር ጊዜ በ6 ወር እንዲራዘም የተደረሰውን አፈጻጸም መገምገምና በትኩረት ክትትል ማድረግ የስብሰባው የትኩረት አቅጣጫ ይሆናል ብለዋል።

የአፍሪካ ህብረት ስራ አስፈፃሚ ምክር ቤትም በሱዳን ወቅታዊ ሁኔታ ላይ በግብጹ ፕሬዚዳንት ሊቀ መንበርነት የፊታችን ሐሙስ በአዲስ አበባ እንደሚወያይም ገልጸዋል።

በጠቅላይ ሚኒስትር ዶክተር አብይ አህመድ በሱዳን ልዩ የኢትዮጵያ መልዕክተኛ በመሆን የተሾሙት አምባሳደር ሙሃሙድ ድሪር ሁለቱን አካላት ካወያዩ በኋላም የሱዳን የነጻነት ሃይሎች እና ወታደራዊ የሽግግር ምክር ቤቱ መግባባት ላይ መድረሳቸው ይታወሳል።

በወቅቱም ሁለቱ ሃይሎች ድርድሩ ከመቋረጡ በፊት በሽግግር መንግስቱ አወቃቀር ስልጣን እና ሃላፊነት ላይ ደርሰውት የነበረውን ስምምነት ለማጽናት ስምምነት ደርሰዋል።

ከዚህ ባለፈም የሉዓላዊነት ምክር ቤት ምስረታ እና ሌሎች ጠቃሚ ጉዳዮች ዙሪያ ተቋርጦ የነበረው ውይይት እንዲቀጥል መስማማታቸውም የሚታወስ ነው።

በተጨማሪም ሁለቱ አካላት ጠብ አጫሪ መግለጫ ከማውጣት እንዲቆጠቡና ውጥረት ለማርገብ ለመስራት ስምምነት መፈጸማቸው ከደረሱት ስምምነት መካከል ተጠቃሾች ናቸው።

በሌላ በኩል የኢፌዴሪ የውጭ ጉዳይ ሚኒስትር አቶ ገዱ አንዳርጋቸው በሳምንቱ መጨረሻ ወደ ጀርመን በማቅናት ጉብኝት እንደሚያደርጉ ቃል አቀባዩ ተናግረዋል።

በጉብኝታቸውም በሁለቱ ሃገራት የጋራ ኮሚሽን እንዲቋቋም በሃገራቱ ከፍተኛ የመንግስት ባለስልጣናት መካካል በተደረሰው ስምምነት መሰረት ኮሚሽኑን ለማቋቋም የሚያስችል ስምምነት በቀጣዩ ሳምንት መጀመሪያ ከጀርመኑ አቻቸው ሄኮ ማስ ጋር በበርሊን ይፈራረማሉ ተብሎ ይጠበቃል።

ከዚህ ባለፈም ኢትዮጵያ ከጀርመን ጋር በተለያዩ ዘርፎች ያላትን ግንኙነት ማጠናከር የሚያስችሉ ውይይቶችን ያደርጋሉ ተብሎም ነው የሚጠበቀው።

በስላባት ማናዬ

You might also like
Comments
Loading...