Fana: At a Speed of Life!

የፌዴራል መንግስት ከከፍተኛ የሲቪልና የመከላከያ አመራሮች ግድያ ጋር በተያያዘ ተጠርጣሪዎችን በቁጥጥር ስር ማዋል መጀመሩን እናደንቃለን- ዶ/ር ደብረጺዮን

አዲስ አበባ፣ ሰኔ 22፣ 2011 (ኤፍ.ቢ.ሲ) የፌዴራል መንግስት በባህርዳር እና በአዲስ አበባ በተፈፀመው የግድያ ወንጀል እጃቸው አለበት ያላቸወን ተጠርጠሪዎች በቁጥጥር ስር ማዋል መጀመሩን የሚደነቅ መሆኑን የትግራይ ክልል ምክትል ርእሰ መስተዳድር ዶክተር ደብረጺዮን ገብረሚካኤል ገለጹ።

ዶክተር ደብረጺዮን በትናንትናው እለት በሰጡት መግለጫ፥ መንግስት ተጠርጣሪዎችን በቁጥጥር ስር ለማዋል እያደረገ ላለው ጥረት የትግራይ ክልል ድጋፍ እንደሚያደርግ አስታውቀዋል።

ከከፍተኛ የሲቪል እና የመከላከያ አመራሮች ግድያ ጋር በተያያዘ እየተደረገ ያለው ተጠርጣሪዎችን በቁጥጥር ስር የማዋል ስራ እና ምርመራ ተጠናክሮ እንዲቀጥልም ጠይቀዋል።

ባሳለፍነው ሳምንት ጽንፈኛ ሀይሎች ያደረጉት እንቅስቃሴ አደገኛ እንደነበር አያይዘው የገለጹት ዶክተር ደብረጺዮን፥ የፌዴራል ስርዓትን በማፍረስ ስልጣንን በሃይል ለመቆጣጠር ያለመ እንደነበረም ተናግረዋል።

ዶክተር ደብረጺዮን በመግለጫቸው አያይዘውም፥ በትናንትናው እለት ከዚህ ዓለም በሞት ለተለዩት የጄነራል አብረሃ ወልደማርያም (ኳርተር) የተሰማቸውን ሀዘን ገልፀዋል።

የጄነራል አብረሃ ወልደማርያም (ኳርተር) በባንኮክ ታይላንድ ዓለም አቀፍ ሆስፒታል የህክምና ክትትል ሲያደርጉ እንደነበረ ዶክተር ደብረጺዮን በመግለጫቸው አስታውሰዋል።

ጄነራል አብረሃ ከ2 ወር በፊት መቐለ በሚገኘው  አይደር ሆስፒታል ለሁለት ሳምንታት ህክምና መከታተላቸውን ያስታወሱት ምክትል ርእሰ መስተዳድሩ፥ የህክምና ባለሙያዎች በሰጡት ትእዛዝ መሰረት ለህክምና ወደ ታይላንድ መጓዛቸውን ገልጸዋል።

የህክምና ባለሙያዎቹ  ጄነራል አብረሃ ሀክምናቸውን በአስቸኳይ በውጭ ሀገር እንዲከታተሉ በሰጡት ትእዛዝ መሰረትም የፌደራል መንግስት እና የሀገር መከላከያ ያለምንም መስተጓጎል ህክምናው በባንኮክ ታይላንድ እንዲከታተሉ ፈቅደው እንደበር አስታውቀዋል።

የፌደራል መንግስት ጄነራል አብረሃ ህክምናቸውን በውጭ ሀገር እንዲከታተሉ ከመፍቀድ በተጨማሪም ሙሉ ወጪ ሸፍኖ እንደነበረም አያይዘው ገልፀዋል።

ዶክተር ደብረጺዮን አክለውም፥ ጄነራል አብረሃ በውጭ ሀገር ተገቢውን ህክምና እንዲከታተሉ ጠቅላይ ሚኒስትር ዶክተር አብይ አህመድ እና ጄነራል ሰዓረ መኮንን ከፍተኛ ትብብር ማድረጋቸውምን አስታውቀዋል።

የጄነራል አብረሃ አስከሬን በነገው እለት ወደ አዲስ አበባ እንደሚመጣ ያስታወቁ ሲሆን፥ አስከሬናቸው አዲስ አበባ ሲደርስም በቦሌ ዓለም አቀፍ አውሮፕላን ማረፊያ አቀባበል እንደሚደረግ አስታውቀዋል።

የቀብር ስነ ስርዓታቸውም ቤተሰቦቻቸው፣ የክልል እና የፌደራል መንግስት የስራ ሃላፊዎች እንዲሆም ወዳጅ ዘመዶቻቸው በተገኙበት በመቐለ ከተማ እንደሚከናወንም ገልፀዋል።

ዶክተር ደብረጺዮን አክለውም በጄነራል አብረሃ ህልፈት የተሰማቸውን ሀዘን በመግለጽ፥ ለቤተሰቦቻቸው፣ ለወዳጅ ዘመዶቻቸው፣ የትግራል ክልል ህዝብና ለመላው የኢትዮጵያ ህዝብ፣ ለትግል ጓዶቻቸው እና ለመከላከያ ሰራዊት አባላት መጽናናትን ተመኝተዋል።

ጀኔራል አብርሃ ወልደማርያም (ኳርተር) በጠና ታመው በታይላንድ ባንኮክ በሚገኝ አለም አቀፍ ሆስፒታል ህክምና ሲከታተሉ ቆይተው በትናንትናው እለት ከዚህ ዓለም በሞት መለየታቸው ይታወሳል።

በትግራይ ክልል ማዕከላዊ ዞን በእንዳባፃህማ ወረዳ እንዲጪዋ ቀበሌ ነሃሴ 21 ቀን 1953 ዓ.ም የተወለዱት ጀኔራል አብርሃም በ58 ዓመታቸው ነው ከዚህ አለም በሞት የተለዩት።

 

 

You might also like
Comments
Loading...