Fana: At a Speed of Life!

የኢትዮጵያ ፕሪምየር ሊግ 28ኛ ሳምንት ቀሪ ጨዋታዎች ዛሬ ተካሂደዋል

አዲስ አበባ፣ ሰኔ 22፣ 2011 (ኤፍ.ቢ.ሲ) ባሳለፍነው ሳምንት በነበረው ወቅታዊ ሁኔታ ምክንያት ያልተካሄዱ የ28ኛ ሳምንት ቀሪ ጨዋታዎች ዛሬ ቀጥለው ተካሄደዋል።

በዛሬው እለትም በአዳማ አበበ ቢቂላ ስታዲየም አዳማ ከተማ ፋሲል ከነማን ያስተናገደ ሲሆን፥ ጨዋታውም 1ለ1 በሆነ የአቻ ውጤት ተጠናቋል።

ውጤቱን ተከትሎ ፋሲል ከነማ ነጥቡን ወደ 53 ከፍ በማድረግ በሊጉ መሪነት ሲቀጥል አዳማ ከተማ ነጥቡን ወደ 35 በማሳደግ ከነበረበት 12 ደረጃ ወደ 10ኛ ደረጃ ከፍ ማለት ችሏል።

በመቐለ ዓለም አቀፍ ስታዲየም በተደረገ ጨዋታ መቐለ 70 እንደርታ ደቡብ ፖሊስን 4ለ0 በሆነ ሰፊ የግብ ልዩነት በማሸነፍ ነጥቡን ከፋሲል ከነማ ጋር እኩል አድርጓል።

ለመቐለ 70 እንደርታ ኦሴይ ማውሊ 2 ግቦችን ከመረብ ላይ ያሳረፈ ሲሆን፥ አማኑኤል ገብረሚካኤልና ያሬድ ብርሃኑ ቀሪውን ሁለት ጎሎች ከመረብ አሳርፈዋል።

ዛሬ በአዲስ አበባ ስታዲየም ከቀኑ 11 ሰአት ቅዱስ ጊዮርጊስና ወልዋሎ አዲግራት ዩኒቨርሲቲ ሊያደርጉት የነበረው ጨዋታ በፀጥታ ስጋት ምክንያት ወደ ሌላ ጊዜ መራዘሙን የኢትዮጵያ እግር ኳስ ፌዴሬሽን አስታውቋል።

You might also like
Comments
Loading...