Fana: At a Speed of Life!

ዜጎች በሀገራዊ የሰላም ሁኔታ ላይ ስጋት ሊገባቸው አይገባም – ወ/ሮ ሙፈሪያት

አዲስ አበባ፣ ሰኔ 23፣ 2011 (ኤፍ ቢ ሲ) መንግስት የዜጎችን ሰላም መጠበቅና ህግ ማስከበር ላይ በትኩረት እንደሚሰራ ዜጎች ስጋት ሊገባቸው አይገባም የሰላም ሚኒስትር ወይዘሮ ሙፈሪያት ካሚል ገለፁ።

ለህገ ወጥ የጦር የመሳሪያ ዝውውር መፍትሄ ለማበጀት ዓለም አቀፍ ልምድ ካካበቱ ተቋማት ጋር እየተሰራ መሆኑንም ጠቁመዋል።

”መንግስት የዴሞክራሲ ግንባታ ሂደቱን ሳይጎዳ ህግ የማስከበር ሚናው ላይ ያተኩራልም” ብለዋል ሚኒስትሯ።

ኢትዮጵያ ዴሞክራሲን ለመገንባት በምታደርገው ጥረት የተለያዩ ፈተናዎች እየገጠሟት ነው ያሉት ሚኒስትሯ ዴሞክራሲን ያለ ህግ የበላይነት ማረጋገጥ ደግሞ አይቻልም ብለዋል።

ከዚህ አንጻር ባለፉት ጊዜያት የህግ የበላይነትን ለማረጋገጥ የሚያስችሉ የተቋማት የአቅም ግንባታ ስራዎች ሲከናወኑ መቆየታቸውን አስታውሰዋል።

ይሁንና በተለያየ ጊዜ የተለያዩ ፈተናዎች እያጋጠሙ እንደነበር የጠቀሱ ሲሆን በቅርቡ የተፈጸሙ የከፍተኛ የመንግስት ባለስልጣናት ግድያ የዚህ አንዱ አካል መሆኑን
አንስተዋል።

መቆጣጠር ባይቻል ኖሮ ችግሩ ይበልጥ የከፋ ይሆን እንደነበር ያሉ ሲሆን ዜጎች ስጋት ሊገባቸው እንደማይገባና ከጸጥታ አካላት ጋር በትብብር በመስራት መሰል ጥቃቶችን እንዲያከሽፍ ጠይቀዋል።

የዴሞክራሲ ግንባታ ሂደቱ በቀጣይም ችግር ሊገጥመው ይችላል በማለት የገለፁት ሚኒስትሯ ይህ እንዳይሆን መስራት የሁሉም ኃላፊነት መሆኑን አንስተዋል፡፡

“ሀገር የሚገነባው እያንዳንዱ ሰው ኃላፊነት ሲወስድ ነው” በማለት ሁሉም ሀላፊነቱን እንዲወጣ ጥሪ አቀርበዋል፡፡

ከዚህ ባሻገር እየታዩ ያሉ ችግሮችን ለማረም በህገ መንግስቱ መሰረት የጸጥታ ኃይሉን የማደራጀት ስራ እየተከናወነ መሆኑን ጠቅሰው ሲጠናቀቅ ይፋ እንደሚሆንና የሚመለከታቸው አካላት እንደሚመክሩበት ተናግረዋል።

ምንጭ፡- ኢዜአ

You might also like
Comments
Loading...