Fana: At a Speed of Life!

አሜሪካ ተጨማሪ 1 ሺህ ወታደሮችን በመካከለኛው ምስራቅ ልታሰማራ ነው

አዲስ አበባ፣ ሰኔ 11፣ 2011(ኤፍ.ቢ.ሲ) አሜሪካ ተጨማሪ 1 ሺህ ወታደሮችን ወደ መካከለኛው ምስራቅ ልትልክ መሆኑን አስታወቀች።

አሜሪካ በመካከለኛው ምስራቅ ተጨማሪ ወታደሮችን የምታሰማራው ኢራን በቀጠናው የምትፈፅመው ትንኮሳ እየጨመረ በመምጣቱ መሆኑን የሀገሪቱ መከላከያ ሚኒስቴር አስታውቋል።

ኢራን ባሳለፍነው ሀሙስ በኦማን ባህረ ሰላጤ ሁለት ነዳጅ ዘይት በጫኑ መርከቦች ላይ ጥቃት መፈፀሟን በዋቢነት ጠቅሷል።

ስለሆነም ኢራን በቀጠናው የምትፈፅመውን ጠብ አጫሪ ድርጊት ለማምከን አሜሪካ ተጨማሪ 1 ሺህ ወታደሮችን በመካከለኛው ምስራቅ ልታሰማራ መሆኑን ነው የሀገሪቱ መከላከያ ተጠባባቂ ጸሐፊ ፓትሪክ ሻናሃን የተናገሩት።

አሜሪካ ከኢራን ጋር ጦርነት የመግጠም ፍላጎት የላትም ያሉት ምክትል ሚኒስትሩ፥ ወታደሮቹ በቀጠናው የሚሰማሩት የአሜሪካንና አጋር ሀገራትን ጥቅም ለማስከበር መሆኑን አብራርተዋል።

በአንፃሩ ኢራን በኦማን ባህረ ሰላጤ ነዳጅ በጫኑ መርከቦች ላይ ፈፀመች የተባለችውን ጥቃት መሰረተ ቢስ ውንጀላ ስትል አጣጥላዋለች።

በሌላ በኩል ኢራን በቀጣዮቹ አስር ቀናት ውስጥ የዩራኒየም ክምችት መጠኗን ለማሳደግ እየሰራች መሆኗን በትናንትናው ዕለት ይፋ አድርጋለች።

ይህም በዋሽንግተንና ቴህራን መካከል የተፈጠረውን ውዝግብ እንዳያባብሰው ተሰግቷል።

ምንጭ፦ ሲ ጂ ቲ ኤን

You might also like
Comments
Loading...