Fana: At a Speed of Life!

አሜሪካ ሁለተኛ የኢትዮጵያ ቡና ገዢ ሃገር ሆነች

አዲስ አበባ ፣ ሰኔ 11 ፣ 2011 (ኤፍ ቢ ሲ) አሜሪካ እየተጠናቀቀ ባለው በጀት አመት ሁለተኛዋ የኢትዮጵያ ቡና ገዢ ሃገር ሆናለች።

ባለፈው በጀመት አመት የኢትዮጵያን ቡና በመግዛት 4ኛ ደረጃ ላይ የነበረችው አሜሪካ ከሳዑዲ ዓረቢያ በመቀጠል ከፍተኛዋ የኢትዮጵያ ቡና ገዢ ሃገር ሆናለች።

አሜሪካ በ2011 በጀት ዓመት 11 ወራት ውስጥ 20 ሺህ 221 ነጥብ 73 ሜትሪክ ቶን መጠን ያለው ቡና መግዛቷን ከኢትዮጵያ ቡና እና ሻይ ባለስልጣን ያገኘነው መረጃ ያመላክታል።

ከተሸጠው ቡናም ኢትዮጵያ 106 ነጥብ 31 ሚሊየን ዶላር ገቢ አግኝታለች።

ይህ የግብይት መጠንም ኢትዮጵያ ወደ ውጭ ከላከችው የቡና ምርት፥ በመጠን 10 በመቶ በገቢ ደግሞ 16 በመቶ ይሸፍናል ነው የተባለው።

ለግብይት መጠኑ ከፍ ማለት በአሜሪካ የተለያዩ ግዛቶች የኢትዮጵያን ቡና በተመለከተ የተሰሩ የማስታወቂያ ስራዎች አስተዋጽኦ አላቸው ተብሏል።

በተያያዘ ዜና የግንቦት ወር የቡና ምርት ግብይት ካለፈው በጀት አመት ጋር ሲነጻጸር ጭማሪ አሳይቷል።

በግንቦት ወር 2011 ዓ.ም 28 ሺህ 448 ነጥብ 99 ቶን ቡና ለውጭ ገበያ ቀርቦ፥ ከ95 ሚሊየን ዶላር በላይ ገቢ ተገኝቷል።

ይህም ካለፈው በጀት አመት አንጻር፥ በመጠን የ 3 ነጥብ 82 በመቶ በገቢ ደግሞ የ 0 ነጥብ 70 በመቶ እድገት ማስመዝገቡን ባለስልጣኑ ገልጿል።

የኢትዮጵያን የቡና ምርት በመግዛት ሳዑዲ ዓረቢያ፣ አሜሪካ እና ጀርመን ቀዳሚውን ደረጃ ይዘዋል።

ከተላኩት የቡና አይነቶች ደግሞ ሲዳማ፣ ነቀምት እና ጅማ በተከታታይ የ31፣ 26 እና 15 በመቶ ድርሻ ነበራቸው።

You might also like
Comments
Loading...