Fana: At a Speed of Life!

በሱዳን መዲና ካርቱም የሚገኙ ሆስፒታሎች አገልግሎት እንዳይሰጡ መደረጋቸው ተገለፀ

አዲስ አበባ፣ ሰኔ 3፣ 2011(ኤፍ.ቢ.ሲ) የሱዳን ወታደራዊ የሽግግር ምክር ቤት በሀገሪቱ ዋና ከተማ ካርቱም የሚገኙ ሆስፒታሎች አገልግልት እንዳይሠጡ ትዕዛዝ ማስተላለፉ ተገልጿል።

ወታደራዊ ሃይሉ በሀገሪቱ እየተካሄደ ያለው ተቃውሞ ተጠናክሮ መቀጠሉን ተከትሎ በዋና ከተማዋ የሚገኙ አብዛኛዎቹ የመንግስትና የግል ሆስፒታሎች አገልግሎት እንዳይሰጡ ማድረጉን የዶክተሮች ማህበር አስታውቋል።

እስከ አሁንም በትንሹ 11 የሚሆኑ ሆስፒታሎች አገልግሎት እንዳይሰጡ መደረጋቸውን ማህበሩ አስታውቋል።

የሱዳን ወታዳራዊ ሃይል ባለፉት ሳምንታት በተካሄዱት የተቃዎሞ ሰልፎች ላይ በፀጥታ ሃይሎች ጉዳት የደረሰባቸው ሰልፈኞች የህክምና አገልግሎት እንዳያገኙ ሲያደርግ መቆየቱም በዘገባው ተመላክቷል።

የሱዳን ወታደራዊ ሃይል  ስልጣኑን ለሲቭል አስተዳደር እንዲያስረክብ  የሚደረጉ ተፅኖዎች በሀገር አቀፍና በዓለም አቀፍ ደረጃ ተጠናክረው ቀጥለዋል ።

በትናንትናው ዕለት በሀገር አቀፍ ደረጃ  የተጀመረው ህዝባዊ እምቢተኝነትም የዚሁ እንቅስቃሴ አካል መሆኑ ነው የተገለፀው።

በትናንትናው ዕለት በአዲስ መልኩ በተጀመረው ህዝባዊ እምብተኝነት  ላይ የተሳተፉ አራት ሰዎች  በፀጥታ  ሃይሎች መገደላቸው ተገልጿል።

ፖሊስ የወሰደውን እርምጃ ተከትሎም የተቃውሞ መሪዎችና አስተባባሪዎች በከተማዋ የሚገኙ ሰራተኞች ዛሬን በቤት ውስጥ እንዲያሳልፉ ጥሪ አቅርበዋል።

በሌላ በኩል የአፍሪካ ህብረት የፀጥታው ምክር ቤት በሱዳን በሲቭል አስተዳደር የሚመራ የሽግግር መንግስት አስኪቋቋም ድረስ ሀገሪቱን ከማንኛውም የህብረቱ እንቅስቃሴ ማገዱ ታወሳል ።

ምንጭ ፦አናዶሉ

You might also like
Comments
Loading...