Fana: At a Speed of Life!

ሚሼል ፕላቲኒ በቁጥጥር ስር ዋሉ

አዲስ አበባ ፣ ሰኔ 11 ፣ 2011 (ኤፍ ቢ ሲ) የቀድሞው የአውሮፓ እግር ኳስ ማህበር ፕሬዚዳንት ሚሼል ፕላቲኒ በቁጥጥር ስር ዋሉ።

ፕላቲኒ ዛሬ ማለዳ ላይ ፓሪስ ውስጥ ኳታር በፈረንጆቹ 2022 ከምታዘጋጀው የዓለም ዋንጫ ጋር በተያያዘ፥ ተፈጽሟል በተባለ የሙስና ወንጀል ተጠርጥረው ነው በቁጥጥር ስር የዋሉት።

በዚህም የዓለም ዋንጫው መስተንግዶ ለኳታር የተሰጠበት አግባብ ላይ ማጣራት የሚደረግ ሲሆን፥ ፕላቲኒም ከጉዳዩ ጋር በተያያዘ ጥያቄዎች ይቀርቡላቸዋል ነው የተባለው።

የ63 አመቱ ፕላቲኒ ከፈረንጆቹ 2007 እስከ 2016 ድረስ የአውሮፓ እግር ኳስ ማህበር ፕሬዚዳንት በመሆን ማገልገላቸው ይታወሳል።

ከሙስና ጋር በተያያዘ ከስልጣናቸው ከወረዱ በኋላ ለአራት አመታት ከእግር ኳስ እንዲርቁ እገዳ ተጥሎባቸው ባለፈው መጋቢት ወር እገዳውን መጨረሳቸው ይታወሳል።

ይሁን እንጅ በእግር ኳሱ በተለይም በዓለም ዋንጫ አስተናጋጅነት ጋር በተያያዘ ተፈጽሟል የተባለውን የሙስና ወንጀል የሚያጣራው ቡድን ከግለሰቡ ጋር ጉዳይ አለን በማለት በዛሬው እለት በቁጥጥር ስር እንዲውሉ አድርገዋቸዋል።

ፕላቲኒ በሃገራቸው ፈረንሳይ በተዘጋጀው የ19 98ቱ የዓለም ዋንጫ አዘጋጅ ኮሚቴ ውስጥ የነበሩ ሲሆን፥ ከ2002 ጀምሮ እስከታገዱበት ጊዜ ድረስም የዓለም አቀፉ እግር ኳስ አስተዳዳሪ አካል (ፊፋ) ስራ አስፈጻሚ ኮሚቴ አባል በመሆን አገልግለዋል።

በቀጣይም የ2022ቱ የዓለም ዋንጫ መስተንግዶ ለኳታር በተሰጠበት አግባብ ዙሪያ ማጣራት እንደሚደረግባቸው ተነግሯል።

ምንጭ፦ ስካይ ኒውስ እና ኢንዲፔንደንት

You might also like
Comments
Loading...