Fana: At a Speed of Life!

መንግስት ለስኳር ፕሮጀክት የመደበው 5 ነጥብ 7 ቢሊየን ብር ወደ ስራ መገባቱ ተገለፀ

አዲስ አበባ፣ ግንቦት 26፣ 2011 (ኤፍ.ቢ.ሲ) መንግስት በተያዘው በጀት ዓመት ለስኳር ፕሮጀክት የመደበው 5 ነጥብ 7 ቢሊየን ብር ወደ ስራ መግባቱን ስኳር ኮርፖሬሽን አስታወቀ።

የስኳር ኮርፖሬሽን ዋና ስራ አስፈጻሚ አቶ ወዮ ሮባ ለፋና ብሮድካስቲንግ ኮርፖሬት እንደገለጹት፥ በዘንድሮው በጀት ዓመት መንግስት ለዘርፉ በሰጠው ልዩ ትኩረት መሰረት የመስኖና መሰረተ ልማት ዝርጋታ፣ የሸንኮራ አገዳ ተከላ፣ የመሬት ዝግጅትና የሰራተኞች ቤት ግንባታ ስራዎች ተጀምረዋል።

ከአምስት ዓመት በፊት የበለስ አንድ ስኳር ፋብሪካ ግንባታ ይጠናቀቃል በሚል እቅድ ተይዞ 13 ሺህ ሄክታር ቦታ ላይ ሸንኮራ አገዳ መተከሉ ይታወሳል።

ይሁንና ፋብሪካው ተጠናቆ ማምረት ባለመጀመሩ ምክንያት አገዳው ለብክነት መዳረጉ ተገልጿል።

ኮርፖሬሽኑም 13 ሺህ ሄክታር ሸንኮራ አገዳው ስኳር የማይሰጥ መሆኑን ተከትሎ ሸንኮራውን በመቁረጥ የማስወገድ ስራ ሰርቷል።

በአሁኑ ወቅትም አዲስ እንዲያፈራ የመስራት እና በአዲስ የመሬት ዝግጅት ሌላ የሸንኮራ አገዳ ተከላ ስራ እየተከናወነ ይገኛል።

እንደ በለስ አንድ በሸንኮራ ተክል ላይ የተሰሩ ስህተቶች ዳግም እዳይፈጥሩ ትኩረት ተሰጥቶ እየተሰራ መሆኑን ተናግረዋል።

ከሸንኮራ አገዳ ልማት እንዲሁም ከመስኖና መሰረተ ልማት ዝርጋታ በተጨማሪ የበለስ አንድ ስኳር ፋብሪካን በቀጣዩ ዓመት ለማጠናቀቅና ወደ ምርት ለማስገባት የማሽነሪ ግዢ እና ሌሎች የግንባታ ስራዎች እየተሰሩ መሆኑንም ጠቅሰዋል።

በተመሳሳይ ኦሞ ቤልት ስኳር ፋብሪካ ላይም የመሬት ዝግጅት ስራና የሸንኮራ አገዳ ተከላ እየተከናወነ ይገኛል ነው ያሉት ዋና ስራ አስፈፃሚው።

በዚህም ሰባት ሺህ ሄክታር ላይ ለታቀደው አዲስ የሸንኮራ አገዳ ተክል እስካሁን ሶስት ሺህ ሄክታር አዲስ ሸንኮራ አገዳ የተተከለ ሲሆን፥ ይህም የሸንኮራ አገዳ ተክል እጥረት እንዳያጋጥም የሚያስችል ነው ብለዋል።

ከዚህ በተጨማሪም የመሬት ዝግጅት፣ የሰራተኛ ቤት ግንባታ፣ የውስጥ ለውስጥ የመስኖና የመሰረተ ልማት ዝርጋታ ስራዎች እየተከናወኑ መሆኑን ጠቁመዋል።

በአጠቃላይ በዚህ መልኩ በሌሎች የስኳር ፋብሪካዎች ላይም ትኩረት ተሰጥቶ እየተሰራ ሲሆን፥ ለዚህም መንግስት በብድር ያገኘው 5 ነጥብ 7 ቢሊየን ብር ተመድቦ ወደ ስራ መገባቱን ገልጸዋል።

በታሪክ አዱኛ

You might also like
Comments
Loading...